In Seui a pustis de sa pandemia torrat sa mùsica. In sa bidda de sa Barbagia de Seùlu su 14 e 15 de austu a tres annos dae s’ùrtima editzione torrat SeuInMusica, su fèstival organizadu dae s’assòtziu culturale Kromatica in paris cun sa Banda Gioacchino Rossini e cun s’assòtziu ‘Seuesi a Cagliari e nel mondo’.
“Torramus a pustis de duos annos – narant sos duos diretores artìsticos Luigi Murgia e Andrea Sanna – e comente in sas editziones coladas bolemus fàghere connòschere sa mùsica isperimentale e promòvere sos artistas sardos”.
Pro duas dies in su tzentru istòricu de sa bidda dae mangianu a su sero b’ant a èssere cuntzertos e jam session. Mùsicos de punta de custa editzione ant a èssere su sassofonista nugoresu Gavino Murgia e Dj Gruff.
Su bighinadu de Santu Giuanni at a èssere su tzentru de su fèstival chi at a acollire àteros artistas comente su Pororoca Trio (Alessandro Cau, Tancredi Emmi e Federico Fenu), Hola sa Poyana su progetu de su casteddaju Raffaele Badas, su duetu Follesa&Schirru de sa cantante Silvia Follesa e su pianista Andrea Schirru. B’at a èssere finas Matteo Muntoni cun su progetu suo ‘Ràdio Luxembourg’ e Riccardo Pittau trombettista avant-jazz sardu.
Ispàtziu puru a sa SeuinStreet Band. Ùnica in su gènere suo in Sardigna, naschet in su 2019 dae sa banda musicale Gioacchino Rossini de Seui chi a sa fine de su 2022 at a acumprire unu sèculu: intre a sa street band 30 istrumentistas (chi tenent dae sos 9 a sos 70 annos) chi sonant funk, R&B, soul e jazz.
Non isceti mùsica. Domìniga 14 austu in sas 21.30 a su Tzentru polivalente at a bènnere projetada a sa presèntzia de su regista sa pellìcula ‘Santamaria’ de Andrea Deidda: unu film giradu in su 2021 in Seui cun sa partetzipazione de diversos abitantes de sa bidda comente atores.
In prus lunis 15 de austu a sas 19 s’at a tènnere su laboratòriu ‘L’Universo inscatolato’ dedicadu a pipios dae sos ses a sos deghe annos e curadu dae su chircadore Matteo Tuveri. Paràulas in rima e esperimentos pro iscobèrrere sas tapas prus importantes de s’istòria de s’universu.
In sas dies de su fèstival at a èssere possìbile puru bisitare su percursu de museos de su Comunu de Seui chi cumprendet sa Palazzina liberty, su Càrtzere baronale ispagnolu de su 1647, sa Galleria tzìvica, Casa Farci e “Sa Omu de sa Maja”. A.D
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
