Su Cussìgiu de sos ministros ghiadu dae sa presidenta Giorgia Meloni at deliberadu sa cuntzessione de un’assignu istraordinàriu vitalìtziu pro Chiara Vigo, maistra de tessidura de su bisso.
Su Guvernu dd’at fatu gràtzias a una lege italiana galu in vigore, sa lege Bacchelli de su 1985 chi cunsentit a traessu de unu fundu ispetziale de sustentare cun unu vitalìtziu tzitadinos illustres chi tenet bisòngiu.
Chiara Vigo est reconnota comente s’ùrtima maistra de su bisso marinu una rara traditzione de tessidura de su Mediterràneu. Issa bivet e traballat in s’ìsula de Santu Antiogu acanta cunservat un’ischire trasmìtidu dae medas generatziones.
Su bisso marinu est una fibra sùtile meda ricavada dae sa Pinna nobilis, unu còtzulu a s’internu de unu conchìgiu de madre perla. S’animale est amparadu dae sa lege pro ite arriscat de iscumpàrrere. Chiara Vigo pigat isceti sos filos lassados in mare dae s’animale sena arrecare disacatu perunu e traballat isceti sos ùrtimos chimbe tzentìmetros de su ‘bioccolo’ sa parte prus pura e pretziada.
Dae unos 300 gramos de fibra a pustis de sa cardatura cun unu trastu antigu e a pustis de sa dissaladura (nde leat su sale) abbarrant agigu 30 gramos de bisso: dae custos si ricavant unos 12 metros de “seda de su mare”.
Su traballu de Chiara Vigo no est destinadu a su cummèrtziu. Segundu su giuramentu chi vìnculat dae sèculos sos maistros de bisso, custa fibra non podet èssere bèndida, ma isceti donada in ocasiones ispetziales.
In su laboratòriu suo Vigo tesset dae in antis visitadores e istudiosos, ispieghende un’arte chi ponet in paris mitu, natura e fide. In lìnia esistet su giassu de su museu de Chiara Vigo chi si podet agatare a s’indiritzu www.chiaravigo.it. S’istòria sua est istada finas contada in unu documentàriu cun su tìtulu “Il filo dell’acqua”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
