Su gin sardu, tra imbentu e rivolutzione alimentare in sas mesas italianas

Su gin prodùidu in Sardigna est sa novidade in sa mesas de su post-virus Corona ammustradu in sa Fiera de Milanu a Rho, chi provat a fàghere tocare cun manu sos imbentos destinados a rivolutzionare s’alimentatzione de sos italianos.

“Sa pandemia at imprimidu una ‘bortada green’ in sos sèberos alimentares – narat Coldiretti in una nota de imprenta -Sunt duncas arribados produtos innovativos, nàschidos cun s’emergèntzia sanitària e cun una furriada cara a sa sostenibilidade in prus de unu àmbitu”.

Su “Gin della nonna” a sa Pompia, pro nàrrere, est nàschidu dae sa collaboratzione intre su massaju giòvanu, Ivano Fodde, 27 annos de Budune, cun sa distilleria Cillario e Marazzi. Est unu gin ùnicu, chi avalorat sa Pompia, s’agrùmene sardu tra sos prus raros in su mundu, de su pigiolu nuscosu e raspinosu, destinadu a unu target giòvanu, gràtzias a s’impreu suo pro retzetas gourmet. S’originale gin, su Louis gin (su nùmene est unu donu a sa mannai de Fodde, chi dd’at fatu amare su sartu e connòschere ònnia ispétzia de fragu o nuscu de sa Sardigna) s’annu coladu at bintu s’Oscar green regionale de Coldiretti e est arribbadu a sas finales natzionales cunfrontendesì cun sas mègius propostas italianas.

E semper unu gin at fatu divenire famosu un’àteru giòvanu massaju, Frediano Mura de Sàdili, delegadu regionale de Coldiretti Giovani Impresa Sardegna. Si tratat fintzas in custa borta de unu produtu ùnicu in su gènere suo, su primu gin ‘elètricu’ a su mundu, chi resesset a provocare piticas iscàrrigas in su paladu de chie lu tastat. Fintzas Frediano cun su gin Lampus at bintu s’Oscar green regionale 2019 e est istadu seletzionadu pro sas finales natzionales in Roma. Gràtzias a sa resèssida e visibilidade otenta, at posca partetzipadu a sa tapa sarda de s’ispetàculu itinerante Dinner Club, cun su chef Cracco e Diego Abbatantuono.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*