🎧 Lo ‘somrís de la magrana’, s’album de Adrià Mor cantadore de mùsica sarducatalana

Lo somrís de la magrana (‘su risu de s’arenada’) est su tìtulu de su discu nou de Adrià Mor, cantadore de Bartzellona. Su traballu est ambientadu in is paesàgios de Sardigna e de is Paisos catalanos, e includet cantzones in catalanu de Bartzellona, in catalanu aligheresu e in sardu. Su Cd tenet is collaboratziones de Joan Garriga (Dusminguet, La Troba Kung-Fu, Mariatxi Galàctic) e Marià Roch (Jarabe de Palo, La Troba Kung-Fu), intre àteras.

Lo somrís de la magrana est unu traballu de cultura lìbera (cun lissèntzia Creative Commons By-Sa 4.0 int) chi podet èssere iscarrigadu de badas dae su situ web www.adriamusic.cat. Is cantzones serbint puru comente colonna sonora a ‘Adrià – Beni cun me’, una trasmissione chi pigat su nòmine de una de is cantzones de Lo somrís de la magrana. Sa trasmissione, una road movie a s’iscoberta de su patrimòniu linguìsticu e culturale de s’ìsula, est cumposta dae ses puntadas, una pro onniuna de is lìnguas de Sardigna.  Sa trasmissione —prodùsida dae EjaTV e Terra de Punt— tenet una frecuèntzia chidajola, e sa prima puntada at a èssere emìtida su 3 de ghennàrgiu 2021 in Rai Sardigna.