Mèrcuris 4 de nadale a is sete de merie in su Teatru Adrianu de Casteddu sa finale de su prèmiu tzinematogràficu Kentzeboghes intregadu a sos progetos faeddados in sardu e in is àteras limbas minoritàrias italianas: in anteprima is pellìculas noas realizadas in s’ùrtima editzione de su cuncursu e sa proclamatzione de is binchidores 2024.
In su Teatru Adrianu ant a èssere presentados in anteprima, a sa presèntzia de is registas, is progetos premiados un’annu a oe e chi sunt devènnidos òperas tzinematogràficas: si tratat de sos documentàrios “Le case del fiume Tirso” de Elisa Meloni, “Ursus” de Antonio Maciocco, “Seu innoi” de Andrea Deidda, “Vederevoci” de Marco Spanu.
Mèrcuris in prus ant a èssere annuntziados is progetos chi ant bintu s’editzione 2024 de su Prèmiu Kentzeboghes. Is binchidores sunt istados seberados dae una giuria cumposta dae sos diretores de Casteddu, S’Alighera e Carbònia de sa Sotziedade Umanitària e presidida dae su diretore regionale Paolo Serra. Is registas ant a tènnere un’annu pro realizare is òperas premiadas. In s’interis de sa serada in fines at a èssere premiadu su mègius curtzumetràgiu realizadu in s’àmbitu de is laboratòrios de produtzione tzinematogràfica “Kentzeboghes Cine Contest”.
Su Prèmiu Kentzeboghes est sustentadu dae s’assessoradu a is Benes Culturales e Ispetàculu de sa Regione Sardigna e dae sa Fundatzione de Sardigna e est realizadu cun sa collaboratzione de: Sotziedade Umanitària de Casteddu – Carbònia – S’Alighera, Babel Film Fèstival, assòtziu culturale RTS – Radio Televisione Sarda, EjaTV, Areavisuale Film, Terra de Punt, Fundatzione Sardigna Film Commission gràtzias fintzas a s’amparu de varios “partner” regionales, natzionales e internatzionales.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
