Bìvere sa vacàntzia sena distratziones, comente si faghiat cando no esistiant sos telefoneddos e bivìamus sena Internet in manu. S’idea est bènnida a duos frades sardos, Gavino e Giuliano Puggioni, chi ant fundadu sa sotziedade Logout Livenow. Si tratat de sa prima agèntzia de ‘Digital Detox’ fata in Itàlia: duas paràulas inglesas pro si referire a unu perìodu de tempus chi una persone sèberat de colare sena social network e trastos tecnològicos.
S’obietivu de s’agentzia nàschida in su 2020 andat prus a in antis, comente benit ispiegadu in lìnia in su giassu: “Organizamus esperièntzias in cales chie partetzipat lassat totus sos istrumentos digitales pro si dedicare isceti a sa Natura. Non cherimus eliminare sa tecnologia dae sa vida nostra ma istacare unu perìodu e imparare a dda impreare prus consapevolmente in sa vida fitiana”.
Intre sas atividade propostas b’at trekking, escursiones in kayak e barca, yoga, laboratòrios e seminàrios. “Cherimus tènnere un’impatu positivu subra de sa vida de sas persones creende consièntzia pro canto pertocat s’impreu de sos aparatos digitales e in su matessi tempus faghende connòschere sa Sardigna”.
Comente funtzionat. Sa prima cosa chi at a fàghere chie sèberat custu tipu de esperièntzia at a èssere cudda de insertare su telefoneddu in una casseta pro torrare a ddu leare isceti a sa fine de s’atividade (podet èssere una die o de prus). Sa matessi cosa pro computer e fotocàmeras. Mancu custos sunt ammìtidos, a fotografare e filmare s’esperièntzia però b’at a èssere unu regista de s’organizatzione. Chi at pensadu fintzas a sas dificultades. In casu de emergèntzia sos ‘biagiadores’ podent èssere mutidos gràtzias a unu nùmeru apòsitu.
Sos logos seberados pro custas esperièntzias sunt vàrios: “S’atividade nostra est bigiante, tra sos balores nostros b’at su de fàghere iscobèrrere e avalorare sa Sardigna”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
