Est bastadu isceti un’emendamentu de duas rigas pro torrare a dare sa pensione a sos polìticos sardos chi setzent in su Cussìgiu regionale.
Su documentu est istadu aprovadu giòbia in s’interis de sa dibata subra sa lege Omnibus, pensada a printzìpiu pro agiudare sas biddas de su Montiferru dannificadas dae sos fogos de trìulas, e pro sas impresas e sos traballadores a pustis de s’apretu de su virus Corona.
Imbetzes in custa lege chi balet 300 milliones de èuros, aprovada a pustis de tres meses, b’est intradu de totu: fintzas sas pensiones pro sos cussigeris regionales de custa legisladura e de cussa colada puru. Sas pensiones fiant istadas abolidas in su 2014.
S’emendamentu est istadu votadu tra sos ùrtimos artìculos de sa lege e aprovadu a sa lestra dae s’Àula. Sa proposta est istada firmada dae Stefano Tunis (de Sardegna 20Venti), Angelo Cocciu (Forza Italia), Giorgio Oppi (Udc), Francesco Mura (Fratelli d’Italia), Franco Mula (Psd’Az) e est cunforme a unu testu de lege aprovadu in sa Cunferèntzia de sas Regiones e Provìntzias Autònomas in su 2019, e previdit unu contributu a càrrigu de su Cussìgiu regionale. “Sa cuota de contributu a càrrigu de su cussigeri est uguale s’8,80% de sa base imponìbile, cussa a càrrigu de s’Assemblea legislativa est uguale 2,75 bias a cudda de su cussigeri”.
In prus in un’àteru emendamentu, aprovadu a sa matessi manera de su primu, nch’est iscritu chi “sas indennidades e sos rimbursos de sos cussigeris regionales mudant annu cun annu cunforma a sa variatziones de sos prètzios”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
