Sa sede de s’Ateneu Alguerès, entidade fundada in su 1987 cun sa punna de traballare pro sa limba e sa cultura catalanas de s’Alighera, at acòllidu sàbadu coladu unu cuntzertu de su cantautore de mùsica catalanusarda Adrià Mor. “So pregiadu meda de pòdere currispòndere a sa gentilesa de s’Ateneu presentende s’ùrtimu discu meu”, at naradu su catalanu a su cumintzu de su cuntzertu, chi at inclùdidu cantzones in totu is limbas de Sardigna e in catalanu de Bartzellona.
Est pròpiu su sèberu de registrare cantzones in aligheresu, su chi at ispintu a s’Ateneu a finantziare s’editzione fìsica de su traballu de su cantautore. Difatis, De Sardenya a Califòrnia, su tìtulu de su discu, est unu versu de sa cantzone “Llua”, cantada in aligheresu in paris cun Meritxell Gené, cantautora catalana. “Amor i ressaca a l’Alguer”, àtera cantzone in aligheresu de su CD, tenet sa collaboratzione de is aligheresos Dario Pinna e Giuseppe Usai. Su discu fìsicu cuntenet, in prus de is testos, is illustratziones de s’artista catalana Tere Borrell, e podet èssere comporadu dae Disco100.com, chi faghet ispeditziones in totu su mundu.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
