S’artista Giorgio Casu, famadu in Sardigna pro sos murales suos, in Santu Antiogu at realizadu sa prima iscultura sua. Sunt istadas difatis postas in s’arborada de Cristolu Columbu cara a su MuMa, su Museu de su mare e de sos mastros de àscia, “Le Vele”. Est un’òpera de arte chi faghet parte de su progetu “I guardiani della bellezza” realizadu dae su Tzentru de educatzione ambientale e sustenibilidade de su Comunu.
‘Le vele’ rapresentant unu donu a sos mastros de àscia de Santu Antiogu, artesanos chi sunt a su matessi tempus sìmbulu de identidade e traditzione de sos cales si chircat de cunservare unu de sos aspetos chi prus ddos rapresentat: sa produtzione de sas barcas a vela latina. Difatis s’òpera est costrùida cun materiale de atzàrgiu de su tipu ‘corten’ e est fata dae duas velas, de chimbe metros prus arta e s’àtera de tres, arrichidas dae decoraduras de arte cuntemporànea.
“Le Vele” sunt fintzas unu tributu a sa vida in s’arborada in antis de su mare, connotu comente “Sa Marina”, coro de su progetu “I guardiani della bellezza” pro canto pertocat s’isvilupu de atziones a amparu de s’ambiente. Custu progetu cheret pònnere in evidèntzia sas persones chi bivent e avalorant sos logos de Santu Antiogu cun sas istòrias issoro.
“Custa est sa prima òpera iscultòrea chi fatzo – cummentat s’artista Giorgio Casu – e so meda cuntentu chi faeddet de mare e de bentu e chi potzat rapresentare unu donu a sa traditzione de sos mastros de àscia. Sas velas sunt ricas de sìmbulos chi, ultres a su mare, torrant a cramare a sa traditzione tèssile e a su cuntestu in ue sunt istadas postas. S’òpera faghet parte puru de un’àteru progetu, de “Street Art e ricualificatzione urbana”, chi at giai bidu sa realizatzione de tres murales in su cuntestu urbanu tzitadinu”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
