Un’àrea birde atretzada cara a mare, cun percursos pedonales e naturalìsticos e pistas pro bitzicletas: un’esèmpiu ùnicu de archeologia industriale de s’àrea portuale de Casteddu. A segare su nastru de inauguratzione de su parcu nou ddoe fiat su presidente de s’AdSP de su Mare de Sardigna, Massimo Deiana e su Sìndigu Paolo Truzzu.
Un’òpera importante ricualificatzione chi at interessadu duas ètaras de s’àrea progetada is annos 50 dae s’ingennieri Pierluigi Nervi pro s’immagasinamentu de su sale. Su costu totale de is interventos est de pagu prus de 5 milliones de èuros e cumprendet su cunsolidamentu istàticu de s’ex depòsitu e de sa banchina chi s’incrarat in su primu tretu de su canale San Bartolomeo (traballos cummissionados a s’impresa Mentucci Aldo de Senigallia), su recùperu de sa gàbbia iscala de s’edifìtziu e de s’istrutura in ferru de su carru-ponte (fatu dae s’impresa Imprendo Italia de Roma), sa mantenidura de sa gru (Impresa Nuova Icom de Assèmini), sa realizatzione de sa passigiada in sa banchina e de una parte de is òperas birdes (Impresa Aurelio Porcu de Casteddu), de is sutaservìtzios (Impresa Diva Srl de Caltanissetta) e sa ricualificatzione ambientale e urbana de totu àrea a inghìriu (Consorzio Stabile Mare de Nàpoli) cun su cumpletamentu de su birde, sa posta de matas de su logu e de s’erba, sa creatzione de percursos tziclu-pedonales, s’installatzione de s’impiantu de illuminatzione e su positzionamentu de òperas de arredu urbanu.
Una trasformatzione cumplessa chi at a permìtere s’isfrutamentu de un’àrea abbandonada finas dae sa metade de is annos 80, e chi ricualìficat cussu tretu de mare de sa tzitade cun ispàtzios pro su tempus lìberu e s’isport e cun percursos naturalìsticos e didàticos chi, gràtzias a s’assèliu de sa banchina chi at a permìrere s’aprodu de imbarcatziones piticas a impatu zero – rugrant totu su canale San Bartolomeo finas a is salinas de Molentàrgius.
“A pustis de deghènnios de abbandonu- at naradu Massimo Deiana, Presidente de s’AdSP de su Mare de Sardigna- podimus gosare torra de unu bene cun unu balore istòricu, culturale e paesagìsticu artu meda. “S’obietivu de s’AdSP – sighit Deiana — de comunu acòrdiu cun su Comunu de Casteddu, est cussu afidare a una gara internatzionale da gestione de s’àrea”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
