Sa proposta de lege “Beniamino Zuncheddu” est pronta a arribbare a Parlamentu. Regortas 50mìgia firmas netzessàrias a s’initziativa de lege populare chi pedit un’agiudu lestru pro is persones detènnidas ingiustamente e vìtimas de errores giuditziàrios chi essint dae su càrtzere. Comente Beniamino Zuncheddu su pastore sardu chi a pustis de 33 annos de presone como est lìberu.
Beniamino Zuncheddu e s’odissea sua. Mancari innotzente
Sa nova dd’at fata pùblica Irene Testa, garante de is deretos pro is detenudos, in paris cun su Partidu Radicale chi at promòvidu s’initziativa, in prima lìnia in custa batalla.
“Bos dia dèpere torrare gràtzias un’a unu. In custos mese apo agatado una solidariedade manna. Apo connotu medas persones partinde dae is voluntàrios chi ant batidu a in antis sa regorta sena sosta, is abogados chi nch’ant acumpangiadu passu passu, is Comunos chi ant tzertificadu is firmas.
Torro gràtzias pro custu a is sardos e a chie dae s’Itàlia etotu s’est unidu a nois. Naturalmente a su Partito Radicale chi at promòvidu custa proposta de lege de tziviltade”.
Sa proposta previdet de donare un’assignu dae su momentu de s’assolutzione finas a sa sentèntzia de rifata de su dannu. Unu tempus, chi podet durare ses, sete, oto, deghe annos, mentras is persones no ischint ite fàghere: unos cantos andant a sa Caritas, àteros sunt custrintos a furare e àteros, in mancàntzia de sa famìlia, diant pòdere pensare de dormire in suta de unu ponte. Beniamino Zuncheddu prus bortas at naradu chi como isse andat a in antis gràtzias a s’agiudu de sa sorre e de sa familla sua.
“Dedicamus custu resurtadu a Beniamino – concruit Irene Testa – e isperamus chi s’istòria sua potzat èssere un’ammunestu pro una polìtica a s’ispissu surda e indiferente. Como però sa batalla sighit, dae is pratzas a su Parlamentu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
