Sa cooperativa sotziale ‘Saludade’ Onlus de Tàtari, formada dae unu grustu de mèdicos ispetzialistas e odontoiatras impinnados in su sotziale, at detzisu de pònnere a disponimentu de is prus disfortunados pròtesis dentales a s’indonu. Sa primu “dentiera suspèndida” est istada donada a unu pitzocu ex detenudu afidadu a sa cooperativa sotziale “Don Graziano Muntoni”, ghiada dae don Gaetano Galia.
Ispirende•si a su giai connotu ‘cafè suspèndidu’, s’initziativa de ‘Saludade’, pro mesu de unu fundu de donatziones, permitit de intregare a s’indonu pròtesi dentària a is persones chi non si ddas podent permìtere. “Chie si siat podet tèndere sa manu a su progetu, faghende una donatzione in dinare, finas pitica – ispiegant is organizadores -. Is dentistas imbetzes ponent a disponimentu sa professionalidade issoro in modu gratùitu. S’assistèntzia sanitària, difatis, a dolu mannu, non garantit sa cobertura de sa pròtesi odontoiàtrica, chi rapresentat su costu prus mannu”.
Is persones chi retzint custu donu benint seberadas dae entes acreditados, assòtzios sena iscopu de lucru, cooperativas sotziales chi tenet ite fàghere cada die cun persones chi sunt in cunditziones econòmicas malas a beru. “A tènnere dentes bonas est importante meda, non solu pro matzulare, ma finas pro is raportos sotziales, de traballu e afetivos – narat don Galia -. In pagos faeddos su sorrisu balet prus de milli paràulas”.
Tàtari. Foto dae Wikipedia (Giuseppe Faedda).
Medas bias non si tenet contu de s’importàntzia chi podet tènnere in sa vida de ogna die. “Custu pitzocu, cando faghiat is lavras de rìere si poniat deretu is manos a dae in antis de sa buca o un’isserpa pro non fàghere bìdere is dentes – sighit Galia -. Nche abarraiat male. Nos bos podides immaginare sa cuntentesa sua cando si nd’est andadu dae sa comunidade nostra. Est abarradu fintzas unu mese in prus pro pòdere otènnere sa pròtesi. Est una cosa bella meda chi nche siat custas initziativas”.
Su bisu de is ses sòtzios fundadores fiat su de coniugare s’atividade ambulatoriale issoro a s’otenimentu de fundos de destinare a su sotziale. Una bia agatadas is risursas su bisu s’est acumpridu. Is campos de interventu sunt tres: primu de totu ddoe est s’odontoiatria sotziale (de su cale faghet parte su progetu “Dentiera suspèndida”), posca sa luta a s’abbandonu iscolàsticu e in fines sa promotzione culturale.
Is fundos sunt gestidos cun trasparèntzia e totu is chi faghet un’oferta si nde podent segurare de comente benit impreadu su dinare dimandende a Saludade. Ogna bia chi benit regortu su tantu pro pòdere comporare una dentiera, benit donada sa noa in su situ internet de sa cooperativa. S’isperu est chi si coitet a regòllere su dinari pro comporare cantu prus “dentieras suspèndidas, in modu chi pro chie nde tenet bisòngiu rìere siat una cosa normale, gosi comente a si bufare unu cafè.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
