Pro tres annos, dae su 22 de ghennàrgiu 2022 finas a su 2024 sa pisca de s’eritzone de mare in is abbas de sa Sardigna at a èssere proibida. Pro is piscadores subàcueos e professionales sunt previstos agiudos e interventos de amparu pro unu totale de 2 milliones e 800.000 èuros (400 mìgia èuros pro su 2021, 1 millione e 200 mìgia èuro pro cada annu de su 2022 e 2023).
Una detzisione cussa de sa Giunta Solinas chi sighit sa lege regionale 17 de su 22 de santandria 2021. Pro mesu de s’assessore de s’Agricultura, Gabriella Murgia, cun una deliberatzione votada durante s’ùrtima setziada, sa Giunta at aprovadu sas lìnias de indiritzu pro in indennizos a sos piscadores.
Su provedimentu at a permìtere a sos eritzos de mare de si torrare a populare a pustis de sa pisca iscunsiderada de sos ùrtimos deghe annos. Sos eritzos de mare chi bivent in sas abbas de sa Sardigna sunt rechèrridos meda dae albergos, ristorantes e dae sos turistas e pro custu motivu arriscant s’estintzione.
Ma immoe, gràtzias a sa lege regionale, in su mare territoriale de sa Sardigna pro tres annos, a cumentzare dae su 22 de ghennàrgiu de ocannu, at a èssere proibidu sa regorta, sa collida, sa detentzione, su trasportu, s’isbarcu e sa bèndida de sos esemplares de eritzu de mare e de sos produtos derivados friscos suos, finas a su 30 abrile 2024.
“Unu firmu netzessàriu – at naradu s’assessora Murgia – pro favorire sa ricostitutzione de custa risursa importante de su mare nostru, posta in perìgulu dae annos de isfrutamentu sena critèriu. Durante custos tres annos, partetzipende sos piscadores, amus a valutare sos efetos de sa serrada de sa pisca e amus a dare sa possibilidade a sos operadores de acumprire fainas de recùperu ambientale, comente a sa netesa de sos fundale e sa rimotzione de sas ainas de pisca. Totu custas fainas – at sighidu a nàrrere s’assessore Murgia – ant a èssere afidadas a s’Agentzia Agris, chi providire a redatare unu Pianu operativu ispetzìficu, de acòrdiu cun su Comitadu tècnicu consultivu regionale pro sa pisca e s’acuacoltura”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
