Adrià Mor, cantatutore catalanu giai notu a is letores de istòrias.it, at publicadu “Non bido s’ora”, su primu sìngulu de su discu imbeniente suo, De Sardenya a Califòrnia (2024). Pro custa ocasione, su cantautore catalanu at tentu sa partetzipatzione de Elisa Carta, cantadora de Urtei, chi aporret aici sa variedade linguìstica de su sardu tzentrale a sa cantzone, cantada de su restu in sardu meridionale. Su vìdeu musicale de sa cantzone est istadu registradu in Califòrnia in paris cun s’atora sarda Franca Bulloni, e est dedicadu a sa gente chi “bivet a tesu de Sardigna e non bidet s’ora de torrare”.
Custu single est sa prima cantzone fata pùblica de su discu De Sardenya a Califòrnia, traballu chi est istadu possìbile gràtzias a meda collaboratziones. A banda de cussa giai mentovada de Elisa Carta, su discu tenet is boghes de Eleonora Peana (L’Alguer), Meritxell Gené (Lleida) e su Coro de Ùsini, in prus de is teclados de Antonio Leardi (Train to Roots) e is violinos de s’aligheresu Dario Pinna, intre àteros. De Sardenya a Califòrnia isperimentat puru cun is sonos de sa traditzione sarda, comente is launeddas de Gratzianu Montisci. Un’anteprima de su discu podet èssere ascurtada dae su situ web www.adriamusic.cat.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
