S’iscuadra de fùbalu de su Cùglieri adotada a pustis de sos fogos

In mesu de s’apretu de sos fogos chi in s’agabbu de su mese de trìulas at bisestradu su Monteferru, s’Assòtziu Memoria Storica Torresina, ente sena iscopu de lucru formadu dae tifosos de sa Torres e amantiosos de fùbalu e isport a totu sos livellos, paris cun sa Biblioteca Popolare dello Sport de Tàtari, ant abertu unu fundu pro agiuare sas populatziones dannificadas.

Mentras comintzaiant a arribbare sas agiudos, su diretivu at inghitzadu a resonare comente impreare sos fundos e a chie intregare sas risursas: s’est detzìdidu de puntare subra de un’initziativa chi podiat èssere prus a presu de sas disponibilidades de s’assòtziu e chi aeret recaimentos positivos a livellu sotziale.
Tando sunt istados pigados cuntatos cun su grupu dirigente de su Cuglieri 1952, chi in sos meses colados aiat comintzadu a traballare pro costituire sa sotziedade noa, sende chi in su tzentru de su Monteferru dae duas istajones non si giogaiat prus a fùbalu.

Gasi est istadu propostu de sustentare sa rinàschida de s’iscuadra locale, cun s’achistu de atretzaduras e materiales netzessàrios pro comintzare a traballare. Su materiale est giai istadu comporadu e in sas dies imbenientes sos responsàbiles de s’assòtziu s’ant a arribbare a Cùglieri dae Tàtari pro cunsignare su materiale pro comintzare s’istajone isportiva comente botzas, sacas, ostàculos, e gosi. In prus ant a bènnere donadas sas divisas dae giogu chi, comente propostu dae sos matessi dirigentes locales, ant a giùghere fintzas su sìmbulu de s’Assòtziu Memoria Storica Torresina.
“Cherìamus chi sos fundos regortos — at naradu Graziano Mura, presidente Amst — tennerent un’obietivu miradu, craru, e cun recaimentos in àmbitu sotziale: su fùbalu in Cùglieri fiat isparidu dae una pariga de annos e, cun sos problemas chi b’at in custu momentu, sa bidda arriscaiat de restare sena giogare pro meda tempus ancora. Comente tifosos de fùbalu, m’est partu giustu fàghere calicuna cosa”.

Fintzas Andrea Sini, diretore Biblioteca Popolare dello Sport, est satisfatu: “B’at medas maneras pro agiuare una comunidade in dificultade. A parre nostru, garantire sa presèntzia de un’iscuadra isportiva est unu fatu importante meda dae su puntu sotziale”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*