Ite est su controllu? E sa libertade? In un’iscenàriu de una gherra sena agabbu, sos personàgios de George Orwell O’Brien e Winston si cunfrontant subra de custas preguntas a s’internu de s’ispetàculu de Gianluca Medas, bogadu a manera lìbera dae “1984”, su libru de George Orwell.
S’ispetàculu, a tìtulu “1984: Ecce homo”, interpretadu dae sos atores Filippo Salaris e Alessandro Pani, naschet dae una coprodutzione tra sas cumpangias ‘Artisti fuori posto’ e ‘Figli d’arte Medas’ e at a èssere presentadu pro sa primu borta sàbadu s’11 de Nadale a sas 20:30 e domìniga su 12 a sas 18:30 in su Teatru Modernu de Pauli.
Sos duos protagonistas, cun sos ruolos de sa guàrdia pro O’Brien e de su presoneri arrennegadu pro Winston, s’afrontant in unu diàlogu chi faeddat de sa vida, de sa realidade comente illusione, de sa libertade, de sa beridade, de s’amore e de sos sèberos chi si depent, o si podent fàghere, pro otènnere su mègius. Chie tenet resone? E chie diat dèvere tènnere resone? S’ossessione de Winston est de connòschere sa fonte de controllu de sa realidade, una realidade chi pro O’Brien est isceti illusòria e guvernada dae su Frade Mannu, o Grande Fratello.
In ambos duos b’est sa consièntzia chi sa risposta definitiva, sa beridade, sa libertade, colant a traessu de su dolore e sa timoria. Fortzis pro si rebellare a su controllu assolutu est bisòngiat una prospetiva noa.
S’iscena est disegnada dae Marco Nateri (chi at contivigiadu fintzas sos costùmenes) e s’agiunghent elementos chi parent chi essant dae su nudda, creados dae sos disinnos luminosos de Andrea Piras, dae sos sonos e dae sas mùsicas de Fabio Coronas e dae sas projetziones de sas animatziones (semper de Fabio Coronas) e de sos vìdeos realizados dae Filippo Salaris, arribbende a fraigare in custa manera unu “universu àteru”, parallelu a su nostru in ue s’istòria sighit una lìnia diferente. Ma a beru sas diferèntzias sunt gasi medas?
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
