Casteddu pranghet Tonino Puddu, unu intre is bosceris prus balentes de s’Itàlia etotu. Est mortu eris, teniat 81 annus. Nàschidu in su bighinadu de Biddanoa, est semper istadu ligadu a cudda zona de sa tzitade.
Puddu faghet parte de cussa truma de pugiles sardos chi aiant fatu connòschere sa boxe internatzionale a su pùblicu sardu e italianu intre is annos ’60 e ’70 de su Noighentos. In paris cun su issu nche sunt is nùmenes de Piero Rollo, Fortunato Manca, Tore Burruni, Franco Udella, Paolo Melis, Marco Scano e àteros.
Dae sa Palestra Sardegna, in sa ruga Barone Rossi logu istòricu de Casteddu pro sa boxe, Puddu in su 1971 aiat conchistadu su tìtulu de campione europeo de is lèbios. Aiat otentu sa vitòria contra a Miguel Velasquez in su stàdiu Amsicora de Casteddu cando a castiare su match nche fiant 25milli personas. Ses annos in antis, in su 1965, in Germània aiat bìnchidu su tìtulu de campione mundiale militare in sa categoria “pesi piuma”.
Fiat abarradu campione europeu pro tres annos amparende su tìtulu contra a is frantzesos Pierre-Claude Thomias e Jean-Pierre La Jouen, e is italianos Carmelo Coscia e Enzo Petriglia. In su 1974 aiat pèrdidu su tìtulu contra su pùgile Ken Buchanan de sa Scotzia. In sa càrriera cosa sua at disputadu 73 addòbios binchende 65 bortas (42 cun ko) e perdende isceti 8 bortas. In Los Angeles aiat gherradu fintzas pro su tìtulu mundiale bintu però dae su messicanu Rodolfo “Gato” Gonzalez a pustis de ùndighi ripresas.
“Arregordo – aiat naradu in s’interis de un’intervista – cando aiat bintu su tìtulu europeu. Su stadiu fiat prenu, is chi biviant in Biddanoa m’aiant batidu finas a domo acanta nche fiat mama, bonanima, chi beniat a ischire is resurtados chi faghia pròpriu dae sa gente. Apo cumentzadu sa boxe de piticu in sa ruga comente totus is pitzocos de cussu tempus”.
In custas oras medas personas in Casteddu sunt arregordende sa “pantera de Biddanoa” cun messàgios e fotografias.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
