S’ant a tènnere in paris cun sas eletziones pro su rennou de su Parlamento Europeu in Casteddu sas eletziones pro seberare su sìndigu nou de sa tzitade. A pustis de sos chimbe annos de gubernu de Paolo Truzzu elèghidu cun su tzentru dereta, sunt chimbe sos polìticos chi su 8 e 9 de làmpadas ant a lutare pro sa cadira prus de importu de Palazzo Bacaredda e pro gubernare Casteddu tra sos annos 2024 e 2029.
Non b’at a èssere Paolo Truzzu a pustis chi at pèrdidu sas eletziones regionales contra a Alessandra Todde. Su tzentru dereta at a èssere rapresentadu dae Alessandra Zedda de sa Lega cun s’agiudu de Fratelli d’Italia, Udc, Forza Italia, Lega-Pli-anima di Sardegna, Alleanza Sardegna, Sardegna al centro 2020, Movimento Civico, Riformatori, Azione.
Proat a divennere sìndigu pro sa de tres bortas Massimo Zedda chi cun su tzentrumanca at giai ghiadu Casteddu dae su 2011 a su 2019. Zedda est sustènnidu dae su Campo Largo, su matessi grupu chi at bìnchidu sas eletziones regionales de freàrgiu.
Curret a solu Giuseppe Farris, s’abogadu pro meda annos polìticu cun su tzentrudereta como at criadu sa lista CiviCa 2024. In cursa pro s’incarrigu de sìndigu b’at finas Emanuela Corda (ex Movimento 5 Stelle) cun Alternativa e Claudia Ortu (Potere al Popolo-Pci).
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
