Covid, obrigatòriu su ‘green pass’: sas règulas de sa carta birde

Dae su ses de austu, comente previdit su decretu guvernativu, in determinados logos, sos tzitadinos ant a dèvere ammustrare unu documentu de identidade bàlidu paris cun sa tzertificatzione birde chi ant retzidu a pustis de sa prima dose de vatzinu. Si nono s’at a pòdere presentare unu tzertificadu chi mustrat de èssere sanados in sos ses meses colados, opuru su resurtadu negativu de unu tampone molecolare, antigènicu o salivare, fatu a in antis de 48 oras.

Su Green pass at a èssere obrigatòriu in zona bianca, duncas in Sardigna at a serbire pro si sètzere in ristorantes, tzilleris, gelaterias, ma non at èssere netzessàriu pro consumare a s’abertu o a su bancu. In zona groga sas atividades de ristoratzione ant a serrare a su pùblicu a sas 6 de merie, imbetzes in zona arantzu e ruja ant a èssere abertos pro su servìtziu de asportu ebbia.

In sos hotel sa carta birde in sas atividades de ristoratzione e tzilleris at a èssere recherta pro sa clientela esterna, ma non pro clientes internos a sas istrutura. Est obrigatòria pro totu sos eventos culturales, fintzas cunvegnos e cungressos, tzentros culturales, museos, mustras, sagras e salas de giogu, ma puru pro ispetàculos a s’abertu comente tzìnema in pratza e cuntzertos, chi ant a dèpere tènnere sos postos giai assignados in antìtzipu pro garantire su rispetu sas distàntzias. Sa tzertificatzione birde at a èssere obrigatòria pro atzèdere a totu sas pischinas, palestras e tzentros benèssere, e su pròpiu pro intrare in sos istàdios.

Dae su primu de cabudanni sa documentu at a serbire pro biagiare cun aeroplanos e trenos a longa percurrèntzia. Su trasportu pùblicu locale e sos traghetos interregionales ant a èssere esentados. Sos tzitadinos chi ant a èssere agatados sena Green pass a s’internu de locales acanta imbetzes est rechertu, arriscant una contraventzione finas a 400 èuros, mentras pro sos bendidores chi los ant fatos intrare, a sa de tres violatziones est prevìdida sa santzione amministrativa atzessòria de serrada de su locale dae una a deghe dies.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*