Si bolides mudare custu mundu semper prus luadu dae sa plàstica, lu podides fàghere cumentzende dae sos sèberos de ogni die. Comente impreende tzìcaras de paperi pro bufare su cafè o papende isceti màndigos chi non benint imboddiados cun sa plàstica. Sèberos piticos chi però podent agiudare a cambiare su modu de fàghere de sas persones.
Un’esèmpiu arribat pròpiu dae s’ìsula nostra, dae s’Universidade de Casteddu, cun 25.000 istudiantes e 3.000 traballadores, chi est istada mentovada dae sa Cummissione Europea pro àere fatu un’apaltu chi prèmiat sos distribudores automàticos de màndigos e bèvidas sena plàstica. Sa gara at permìtidu de collocare in totu sos 64 ispàtzios de s’Ateneu istèrgios realizados in materiale 100% cumpostàbile, de Tetrapack, cun sa punna lòmpere a unu mundu sena plàstica comente est prevìdidu dae sos critèrios de su Ministèriu de s’Ambiente e arribare in custa manera a una gestione prus sustenìbile de sos refudos.
Pro fàghere un’esèmpiu, pro su cafè impreadu, est a nàrrere sa mama de su cafè, est istadu prevìdidu chi siat cunferidu a sos tzentros de cumpostura pro lu torrare a impreare a traessu sa produtzione de contzime orgànicu, respetende sos printzìpios de s’economia tzirculare.
In prus, sa matessi Universidade, in unos cantos eventos comente atòbios acadèmicos e cunferèntzias, at proibidu s’impreu de ampullas e tassas de plàstica, e at fintzas prevìdidu de donare a sos istudiantes de su primu annu burratzas de atzàrgiu pro s’abba.
Custa est solu s’ùrtima initziativa chi si còllocat in s’àmbitu de su percursu cumentzadu dae s’Universidade de Casteddu orientadu a sa sustenibilidade ambientale, sotziale, econòmica, in lìnia cun sas tareas de isvilupu sustenìbile de s’Agenda Onu 2030.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
