S’istòria de is Banda Beni chi ant imbentadu su Rock-Cabaret

Is Banda Beni. Foto dae sa pàgina Facebook de su grupu

A pustis de sa disispedida in su mese de ghennàrgiu 2020 de su cantante Mario Biggio, est a nàrrere “Ziu Lilliccu”, torra unu lutu at corpidu sa banda istòrica sarda de is “Banda Beni”. Martis s’est mortu Carlo Vespa, vocalista de su grupu connotu cun su pseudònimu de Sebastiano Todde, frade de Filippo.

A donare sa noa mala est istada sa pàgina facebook de sa banda: «Notesta nos at lassadu s’istimadu Carlo Vespa, dae annos medas amigu e cumpàngiu de biàgiu nostru. Pro nois issu fiat Sebastiano Todde, compare de Ziu Lilliccu, autore e interprete de una pariga de is prus bellas cantzones nostras. Ma Carlo est istadu “unu de is mègius, se non su mègius, vocalistas de is annos ’70 e ’80” – at iscritu s’amigu Paolo Porcu. Teniat unu timbru de boghe particulare e personale a beru e at iscritu medas cantzones bellas, calicuna de custas inèditas puru.   De is formatziones chi at fatu parte subenimus “40° parallelo” e “Mammuth ’77”, chi posca at a divènnere “Il Gruppone” cun sa publicatzione de su ’45 giros “Bella” e “Il Vecchio con l’armonica” – branu iscritu pròpiu dae Carlo. Immoe podet cantare “Grazias a Deus” paris cun su nostru Mario Biggio in Paradisu»,  mortu un su mese de ghennàrgiu de s’annu coladu.

Is Banda Beni non sunt istados unu grupu musicale ebbia, ma is imbentores de su  Rock-Cabaret. In cada serada ogna cantzones beniat pretzèdida dae trallalleros e  iscenas ispassiosas acanta partetzipaiat fintzas su pùblicu. Est istadu pròpiu custu modu de fàghere brulleri  a fàghere sa fortuna issoro.

Fiant nàschidos in su  1976, cando in su programma Nobody Nosus de sa ràdiu lìbera casteddaja  Rama Sound, faghent sa prima essida issoro duos pessonàgios: Nicola Il Ciabattino e su Professor Cruculeus, ambos duos interpretados dae Mario Biggio. Est inoghe chi Marcello Mazzella, chi tando aiat parte in sa ràdiu e in s’eticheta discogràfica in pessu ingendrada La Strega Records, intendet pro sa primu borta Sa ballara de Ziu Lilliccu, primu tìtulu de su cantzone. Iscritu dae Mario Biggio benit sonadu  dae Gli Scuali 71 paris cun is carrales Carlo e Filippo Vespa. S’ora de unu provinu e naschet sa formatzione de is Banda Beni chi pùblicat su  primu 45 giros (“Ziu Lilliccu” e “Mamma tua”).

Is Banda Beni in is seradas issoro proponiant iscenas còmicas e tzascos ispassiosos.  Togas meda is versiones umorìsticas de branos famados comente “Rock around the clock” de Haley, torradu a mutire “Rock e poi mi crock”, opuru  “Day Tripper” , furriada in “Di ‘e trippa”, o ancora “Somebody to love” torrada a intitulare “Simeone Locci”. Fiant musitzistas e cabaretistas in su matessi tempus. In su 1977, in sa sienda  de su babbu de un’amigu de Mario benit giradu su chi si diat pòdere definire unu de is primos  videoclip fatos in Sardigna e forsis in Itàlia puru: unu filmadu in biancu e nieddu acumpangiadu dae is notas de “Ziu Lilliccu”. Su vìdeu fiat andadu in direta in Videolina, cussa putu nàschida dae pagu, in is pàusas de sa programmatzione. Is Banda Beni oramai aiant conchistadu su pùblicu isulanu.

S’annu a pustis, su 3 de mese de argiolas 1978, sa primu serada issoro a Santu Sidoru, cun isceti duas chiterras e unu repertòriu de una pariga de cantzones ebbia. Est in custa ocasione Giorgio Ghiglieri at a devènnere fònicu de sa truma. A cabudanni partètzipant a su Cantagiro: in s’stàdiu de Sant’Elia, in dae in antis a unu pùblicu de 10.000 persones, presentant  una versione galu provisòria de “Deu” prus connota comente “Bella Calasetta”. Su branu at a divènnere casi una cantzone de cultu (in su 1985 su Comunu de Cala Seda at dare sa tzitadinàntzia onorària a Mario Biggio). Pagu a pustis at a essire su primu album fortunadu issoro. In su 1985 is ùrtimas esibitziones issoro, posca prus nudda.

In su 2015, a pustis de 15 annos de mudìmine,  est essidu”Compillescion”, album publicadu dae La Strega Records cun bìndighi cantzones prus connotas de sa truma, antitzipadu dae s’abertura de su situ ìnternet.In sumese de cabudanni de su 2018, istorchende su primu Ziu Lilliccu, essitSuccubeeh un banu chi contat de sa rassignatzione de is berbeghes. Firmadu dae Mario, est torra èditu dae La StregaRecords de Marcello e pro sa primu bia benit distribuidu in ìnternet.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*