Is cadditos chi Costantinu Nivola, s’artista de Orani tra is prus famados de Sardigna, aiat realizadu in su 1964 paris cun Richard Stein pro su parcu Wise Towers no ddoe sunt prus: sunt istados bogados a pustis de unos cantos traballos chi ant interessadu sa pratzita. Unu fatu birgongiosu pro sa tzitade americana chi no est istada capassa de amparare su progetu pùblicu prus mannu de Nivola in New York. Podet èssere chi is autores mancu connoscherent su balore de s’òpera e custu forsis est fintzas peus. E si esseret aici calicuna dimanda tocat a si dda fàghere in Sardigna puru.
Eris sa noa publicada in sa pàgina Facebook de su Museu Nivola de Orane s’est ispainada a sa lestra in sa retza. “Est unu fatu indignu – ant iscritu is de su museo – pro ite non semus alleghende de s’atzione de vàndalos, ma de unu progetu de ‘rennou’ pùblicu de s’àrea. De s’òpera, ispirada a s’istatuària orientale e a is cadditos a calapesa de is pipios, isciusciada a caladas de màgiu, sunt abarrados in pees prantados in terra ebbia”.
Is istatuas de Nivola. Carca pro ismanniare sa figura
E a nàrrere chi totu custu est acontèssidu a pustis de sa mustra de su 2020 ‘Nivola. Figure in Field’ fata in sa ‘The Cooper Union’ e a prus pagu de duos meses dae sa pròssima espositzione intitulada ‘Nivola. Sandscapes’ in programma in su ‘Magazzino Italian Art’. “Est istadu un’atu de vandalismu istitutzionale chi non tenet perunu sentidu. Sa ricualificatzione de is turres, giusta e benebènnida, si diat èssere pòdida fàghere rispetende s’istòria e s’arte. Oe est una die trista pro su museu Nivola, pro sa Sardigna, e pro totu is amantiosos de s’arte”.
Su Museu de Orane, paris cun sa famìlia de s’artista e is istitutziones impinnados a promòvere su messàgiu e sa memòria de Nivola, sunt chirchende de allegare cun is chi ant fatu is traballos, pro bìere si ddoe est sa possibilidade de sarbare parte de s’òpera. Oe Massimo Zedda, capugrupu de is Progressistas, at pedidu in consìgiu regionale de motivare su consoladu de New York pro cumprèndere ite fine ant fatu is istàtuas. Sa chistione est aberta.
Is cadditos de Nivola (foto de su 2019)
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
