S’Aga Khan at fatu s’aeroportu sena pedire dinare pùblicu. Custa, in sìntesi, fiat s’allega de sos esponentes màssimos de sa Giunta regionale, sa presidente e s’assessore de su Turismu.
Su die a pustis dae su situ de sa Regione ant dadu nova de s’aprovu de s’atu de indiritzu pro s’istèrrida de su bandu “Nuove rotte”. Sa faina est promòvida dae su tandem de assessorados de sos Trasportos e (mancu a lu nàrrere) de su Turismu.
Totu custu ponende 10 milliones de dinare pùblicu pro su 2025 e àteros 10 pro su 2026 cumpensende gasi sos gastos aeroportuales: su 50% de sos chi sas cumpangias sustenent in s’aeroportu de mòvida e in su de lòmpida pro «fatzilitare s’ativatzione de rotas aèreas noas chi nos colleghent a paritzas destinatziones in Europa e peri su mundu».
«S’obietivu nostru est su de garantire a sos sardos oportunidades prus mannas de mobilidade. Gasi etotu intzentivare sa lòmpida de turistas in s’annu intreu contribuende a sa crèschida de s’ìsula». Custas sas paràulas de s’assessora de sos Trasportos Barbara Manca.
Gasi Franco Cuccureddu, su collega suo cun dèlega a su Turismu: «Cherimus promòvere s’ìsula ispantosa nostra acreschende semper de prus sas presèntzias turìsticas».
In su bandu b’ant a èssere bolos dae Casteddu e Terranoa conca a New York e Filadèlfia. Mentovados finamentas sos collegamentos cun Instanbul e cun «paritzas tzitades europeas» de Frantza, Germània, Rennu unidu, Ispagna, Polònia e àteros paisos cun iscalos finamentas in S’Alighera.
De prus: in programma fintzas sas rotas S’Alighera-Casteddu e Terranoa-Casteddu che chi non si potzat investire in àteros tipos de trasportos internos.
Ma sende chi sas dies coladas ant faeddadu de su rispetu de s’ambiente in intro de sa narratzione printzipesca de s’Aga Khan, s’allega de su bandu nou non si nche podet istesiare dae duas chistiones prus chi non graes.
Sa de su subra-turismu cun iscenàrios chi si diant pòdere acurtziare a sa realidade baleàrica; sa de su grandu incuinamentu cajonadu dae sos trasportos aèreos. Totu custu cun 20 milliones de èuros de dinare pùblicu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
