Veturas tzinesas cun tecnologia sarda S'acòrdiu de su colossu automobilìsticu Xpeng cun una sotzietade sarda pro isvilupare unu sistema de emergèntzia.

Sa sotziedade sarda Abinsula, fornidore de tecnologias de s’informatzione e de sa comunicatzione fundada in Tàtari in su 2012, at firmadu un’importante acòrdiu cun su colossu automobilìsticu tzinesu Xpeng, chi bolet impreare sa tecnologia de sa sotziedade sarda pro conchistare s’Europa. Dd’at fatu a ischire Andrea Sanna, amministradore delegadu de Abinsula, chi a pustis de annos de tratativas, est resèssida a si fàghere unu nùmene in su mercadu asiàticu. “Semus negotziende cun àteros produtores mannos- at naradu Sanna- e isperamus de pòdere serrare àteros acòrdios de collaboratzione”.

Xpeng est un’indùstria importante meda de su mercadu asiàticu de is veturas elètricas. At giai fatu investimentos mannos in is Istados Unidos, acanta at abertu diversos istabilimentos in sa Silicon Valley, est cuotadu a Wall Street e immoe bolet fàghere connòschere sa P7, s’ùrtima nàschida de sa domo automobilìstica tzinesa, fintzas in su mercadu europeu. A s’operatzione at a leare parte Alibaba, su cuncurrente asiàticu de Amazon pro su cummèrtziu eletrònicu, ma pro sa tecnologia Xpeng s’at a afidare totu a s’azienda sarda.

Abinsula, s’at a ocupare mescamente de sa progetatzione e de s’implementatzione de su sistema de mutida de emergèntzia. “Capitende un’intzidente- at sighidu a contare Sanna- s’iscàtula collocada in sa màchina s’ativat a sola, mutit is sucursos e donat informatziones a pitzu de is cunditziones de sa vetura, nùmeru de passigeris e logu acanta est acontèssidu”.

Pro s’ammanniare s’azienda sarda, chi tenet comente atividade printzipale su setore automobilìsticu, at puntadu totu in sa chirca. “In Tzina amus cumentzadu una collaboratzione importante cun is universidades, mescamente cun sa Sun Yat-sen University, e cun is tzentros issoro de chirca e isvilupu de tecnologias innovativas pro sa màchina e sa mobilidade elètrica”, at annantu Antonio Solinas, diretore Chirca e Isvilupu de su grupu.

“A nos indanimare in su chi semus faghende – at iscoviadu Katiuscia Zedda, responsàbile Calidade de Abinsula e de is progetos internatzionales, chi est istada paritzos meses in sa tzitade Guangzhou – est istada sa partetzipatzione tra su 2018 e su 2019 a unas cantas missiones internatzionales coordinadas dae su guvernu tzinesu e dae su Consoladu Italianu de Guangzhou, e a medas cunferèntzias e fieras internatzionales chi nos ant permìtidu de connòschere e de nos fàghere connòschere in is distretos tzinesos de sa màchina”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*