Su fotògrafu chi in Mòguru at agatadu s’Amèrica

S’intìtulat “Non è l’America”, su segundu libru fotogràficu de Stefano Pia publicadu dae Soter Editrice de Salvatore Ligios, giai istòbile in su giassu www.stefanopia.eu e in unas cantas librerias de su setore in Sardigna e in Itàlia. Si tratat de unu contu de immàgines chi tenet comente protagonistas pastores e pegos de is sartos de sa Marmidda de Aristanis, logos chi parent deretos de essire dae is film western di Sergio Leone.

Gosi comente aiat fatu cun su primu “Kilometro Zero”, su fotògrafu moguresu Stefano Pia, 43 annos, in custu traballu nou sighit a contare sa bidda cosa sua pro mesu de contos chi chircant sa bellesa de is cosas simpres in sa vida de ogni die. A intro s’agatant is testos de Francesco Cito, Sandro Iovine e Salvatore Ligios.

Cun su progetu “Non è l’America”, Stefano Pia at bìnchidu dae pagu su primu prèmiu a su 2° Corigliano Calabro Fotografia book Award 2021, cun sa sighente motivatzione de Francesco Cito: “Su sèberu finale de su cuncursu, in prus de sa cumpositzione de is fotografias e de su sugetu, est dèpidu fintzas a su fatu chi tra is traballos giuigados est su chi s’aprèsiat de prus a su cuntzetu de foto-libru, acanta ogni fotografia no est mai ripetitiva, cun una sìntesi de contu non fàtzile, bidu su sugetu chi issu tratat”.

“Mancari su tìtulu si rifèrgiat a sa conchista de s’ovest americana – sighit a nàrrere -, issu contat in veridade s’iscunfortu de unu territòriu, su de sa Sardigna, chi galu oe est una terra tosta e difìtzile (chi torrat cun s’idea de terra de làcana) e in tzertos cuntestos paret comente chi totu si siat firmadu, acanta s’ùnicu sinnu de progressu est sa presèntzia de is màchinas parchegiadas a inghìriu de su chi diat dèpere pàrrere un’istàulu. In prus in sa simpridade sua, cunsiderende su logu e su cuntestu, nde essit a campu una nota poètica prena un’anneu chi imbòligat ogni cosa, donende a su contu sa dimensione giusta sua de terra de frontera”.

Custu est su cummentu fatu dae Sandro Iovine a su libru de Stefano: “Is de sa generatzione mia, ma peri medas de is levas prus giòvanas, sunt crèschidos cun is immàgines hollywoodianas istereòtipas de su far west. Logos agrestes, in ue sa vida fiat detzisa dae règulas simpres chi in s’immaginàriu nostru dipendiant dae sa lestresa cun sa cale una pistola beniat istacada dae su fodde. A su mancu pro nois europeos, totu fiat inghiriadu dae ispàtzios mannos, casi desèrticos, prenos de matas ispinosas, pedras e caddos agrestes. Fintzas inoghe, in is sartos nostros, podimus agatare pedras e caddos e sa pagu populatzione de sa Marmidda in provìntzia de Aristanis, faghet pàrrere prus mannos is logos acanta is allevadores gestint aziendas agrìculas piticas a probe de Mòguru. Comente in unu ranch de s’Ovest larganu, fintzas inoghe sa vida est fata de traballu e su bestiàmine faghet parte de sa famìlia. Gasi cando andas a ddos agatare tenes sa matessi sensatzione chi su paesàgiu, is caras, finas su modu de fàghere issoro, betendende is barrieras de s’ispàtziu e de su tempus, t’apant ingùrtidu in su West betzu americanu. Ma custa no est s’Amèrica”.

“Sa publicatzione est una seletzione manna de is medas biàgios de Stefano Pia in is terras de sa Marmidda de Aristanis, devènnidas in su tempus su logu turmentosu dae esplorare cun sa màchina fotogràfica – narat Salvatore Ligios, editore de su libru -. Faeddos-versos cantados a fiolera mògoro-e-is-moguresos, sonos e richiamos dae su profundu, simpridade e casualidade, gestos fitianos repìtidos dae s’arbèschida a s’arbeschidòrgiu, addòbios ocasionales e sighimentos ossessivos, cun passu lèbiu e iscatos discretos su fotògrafu sighit a contare su mundu acanta bivet e istat, tra fìgios chi creschent e àteros arribbados noos chi incùidant, semper a chilòmetru zero. Su colore est pro fortza su biancu e nieddu, e su contu cumintzat a donare frutos: est una noa de pagu tempus su primu prèmiu a su Fèstival de Corigliano Calabro Fotografia 2021″.

“Custa segunda tapa editoriale – concruit Ligios – àrtziat sena duda sa maturidade achirida dae Pia e su pensamentu tìpicu de is noitzolos iscumparet in manera àbile in is istòrias propostas, in s’istrategia de lassare chi is sugetos pigados e is atziones fissadas in su fotogramma s’ofèrgiant cun naturalesa a sa mirada de s’ispetadore, mentras in s’umbra su regista tesset sa trama chi su caminu ponet a disponimentu. Su resurtadu est un’istòria locale originale chi faeddat a unu pùblicu universale”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*