Dae sas situatziones prus tràgicas podent nàschere esperièntzias de agregatzione sotziale e tzìvica de importu mannu. Est acontèssidu in custas chidas in Cùllieri ue unu grupu de persones at creadu un’assòtziu cun sa punna de promòvere sa renàschida de su Montiferru corfidu dae sos fogos de su mese de trìulas.
S’assòtziu est istadu presentadu dae su presidente suo, Pietro Paolo Arca, paris cun su diretivu e unas deghinas de iscritos. A sa presentada oe nche fiant puru amministradores de àteras biddas e de s’Unione de sos Comunos. Totus bolent traballare pro agiudare su setore agrìculu, forestale, ambientale e sòtziu-culturale.
Sos fogos deu custu istiu ant distrutu mìgias de ètaros de padente, cun unu disacatu mannu pro totu sa Sardigna. Sunt istadas corfidas chèntinas de aziendas chi ant pèrdidu istruturas e animales. Ma su disacatu peus est acontèssidu a su setore de sas olias.
In deretura s’assòtziu nou at a promòvere una collida de fundos pro totu sas fainas chi at a serbire pro sa rinàschida de su territòriu e de sas produtziones, cumpresu s’achirimentu de matas de olias de torrare a pònnere in sos campos brusiados. S’at a traballare posca pro s’amparu de s’ambiente e pro custu s’assòtziu at a sustentare progetos de istùdiu e chirca.
“Nos at a tocare unu disafiu mannu e difìtzile pro torrare a donare bellesa e dignidade a su sartu nostru, a s’ambiente, a sa traditzione agrìcula e mescamente a sas populatziones chi bivent in sos territòrios de su Montiferru. Ddu devimus a s’istòria nostra e a su benidore chi nos tocat a cunsignare a sas generatziones noas”. Custas sas paràulas de su presidente Pier Paolo Arca: “At a èssere unu traballu costante chi amus a arrichire longu su caminu. Un’atentzione particulare l’amus a dedicare a sos prus piticos e a sas iscolas chi ant a èssere interessadas in diversas fainas de formatzione”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
