Sighi∙nos

Salude, ite ses chirchende?

Cultura

Sa Frisia, s’organizatzione e su tempus benidore de sa limba

Pentzende a comente at a èssere sa limba nostra dae inoghe a chimbant’annos nos diamus a dèpere fàghere una pregunta.

Ite semus faghende oe? Ite istrategia tenimus? Cale est sa punna de totu su chi ponimus a currere cando faeddamus de polìtica linguìstica, de tempus benidore de sas comunidades linguìsticas minores?

Fortzis in contu de custas preguntas diat a tocare a abaidare su chi sutzedit foras dae sas làcanas nostras, foras dae sas de s’Italia e de sas leges suas.

Onni minoria tenet prus chi mancu sos matessi problemas: sa diglossia, sa trasmissione intergeneratzionale, s’iscola, sos mèdios de comunicatzione, etc… Ma onni comunidade reagit a manera diferente, onni limba de minoria ponet fronte a manera sua a sos problemas chi tenet.

In contu de custu est interessante su chi faghet sa Frisia. Su frisone est sa segunda limba de sos Paisos Bassos. Si faeddat in una regione, sa Frisia, chi contat prus chi mancu 650 mila abitantes. Prus pagu meda de sa Sardigna, amus a nàrrere, ma sa chistione no est acapiada a sos nùmeros, nimancu a cussos chi pertocant sos finantziamentos mannos chi tenet. Sa cosa interessante de custa minoria est s’organizatzione.

Sa Provìntzia (chi diat a èssere che sa Regione nostra) finantziat, coordinat e pigat parte in totu sos progetos. Totu sos entes finantziados traballant paris, onni unu in su setore suo, pro lòmpere a sa matessi punna: su bilinguismu e su deretu linguìsticu. Issaras ispantat comente cun formas amministrativas innovativas, progetos pùblicos e privados allobant a pare, ponende a traballare gente meda e agatande foras àteru dinare pro fàghere crèschere sa possibilidade chi sa limba e sa cultura non s’isperdant.

Sa cosa de prus importu, in Frisia, est ca onni ente, fondatzione o sienda privada, est in intro de unu sistema chi ponet totus in sa cunditzione de traballare (donniunu in su suo), tenende in palas sas istitutziones, sa regione, s’istadu. Tando, onni borta chi onni unu si presentat foras dae sas làcanas suas podet semper nàrrere, in calchi manera, de rapresentare sa terra, sa cultura e sa limba sua.

In Italia e in Sardigna onni unu rapresentat solu issu etotu, sos Entes sunt atesu dae una idea de retza intro de pùblicu e privadu e issaras su resultadu est chi ananti de s’Europa perdimus, non contamus nudda, non podimus pretèndere nimancu de èssere pigados in cunsideru.

Su chi podimus imparare dae sa Frisia est chi s’organizatzione, sa capatzidade de pònnere paris totu sas fortzas de unu territòriu torrat a sa limba su chi onni unu solu non podet. Sa letzione de custos logos est ca – mancari chi issos puru tèngiant problemas de istandard, ideas metodològicas diferentes intre issos, o ideas polìticas contràrias – s’obietivu contat de prus e su sistema e sa colletividade si pigat in càrrigu sa sienta culturale e linguìstica. Sas impresas, sos assòtzios, s’universidade sos sos sìngulos professionistas sunt unu istrumentu in intro de unu cuntestu prus mannu chi amparat, e ponet totu suta de sa matessi insigna.

Duas cosas: a un’ala totus in Sardigna diamus a dèpere fàghere unu passu in segus, a s’àtera sa Regione nde diat a dèpere fàghere unu mannu a in antis, pighende in càrrigu cun coràgiu su patrimòniu nostru, amparende e pondende paris sa fàmìllia, oe, pro su tempus chi at a bènnere.


Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22

Pro respùndere

Leave a Reply

Il tuo indirizzo email non sarà pubblicato.

De lèghere

Cultura

Bentu est sa pellìcula noa de Salvatore Mereu. Su film de su regista de Durgali est istadu presentadu a sa de 79 editziones de...

Atualidade

Non paret chi b’apat coladu bator annos ebbia, ma meda de prus, dae cando sos de su carrabusu de Autodeterminatzione pariant seguros de nche...

Cultura

Su mutetu est una de is formas de cantu tìpicas de sa traditzione poètica de sa Sardigna. A unu tempus su cantu a mutetu...

Cultura

Sa cumpangia teatrale Tedacà arribbat a Sardigna pro torrare a ammaniare s’ispetàculu “Fine pena ora”, sa rapresentatzione noa leada dae su libru omònimu de...