Sighi∙nos

Salude, ite ses chirchende?

Atualidade

Eletziones, sena agiudos sos pastores torrant a protestare

A belle deghe dies dae sas eletziones polìticas sos pastores sardos torrant a si fàghere intendere. Finas in sos sartos sunt sufrende pro more de s’aumentu de sos prètzios de s’energia chi nche sunt in totu su paisu ma in prus, narant, nemos de sos polìticos est proponende agiudos pro sos pastores.

Tando sos traballadores sunt pensende a una protesta noa. Dd’at naradu Nenneddu Sanna chi a sa fine de su 2019 fiat istadu tra sos portaboghes de sa chèscia contra a s’aumentu de su prètziu de su late. “In sos programmas eletorales de sos partidos nemos faeddat de sos pastores cunsiderende chi dae tres annos a oe su problema in Sardigna non est istadu risòlvidu: pro nàrrere como sa bulleta de s’energia costat tres bortas de prus, sa nafta su dòpiu”.

Segundu Sanna sos candidados diant dèpere sutaliniare s’importu de s’allevamentu pro sa Sardigna: “Si ruet su setore nostru, chi est de importu mannu pro medas biddas de s’ìsula, est sa fine de totu e puru àteros problemas comente su spopolamentu s’ant a agravare. Sena rispostas amus a torrare in pratza”.

Sa lota de sos pastores pro unu prètziu prus giustu de su late tenet prus de binti annos ma isceti in su 2019 est iscopiada in una protesta prus manna cun atziones contra casifìtzios e assaltos contra sos càmion de sos industriales. Sa punta prus arta est istada cando sos pastores aiant firmadu s’istrada 131 e fuliadu a terra su late chi aiant mùrghidu. Sa protesta, alimentada dae sas retzas sotziales e pro calicunu a sa cua dae algunos partidos polìticos, si fiat firmada a pustis de sas eletziones regionales in sas cales fiat istadu eletu presidente Christian Solinas. Ma su problema, colados tres annos, est abarradu.


Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22

Attività realizzata col contributo della Regione Sardegna – IMPRENTAS 2021-2022. LR 22/2018, art. 22

De lèghere

Cultura

Si podet fàghere arte e tzìnema fintzas impreende unu telefoneddu. In su mundu nche sunt medas festival de tzìnema chi promovent pellìculas realizadas gràtzias...

Atualidade

Prus de 18 mìgias sardos ant lassadu s’Ìsula in sos ùrtimos tres annos. Una comunidade manna comente a su comunu de Pauli, comente sa...

Cultura

Si narat “La tua memoria è la nostra memoria”, su progetu aparitzadu dae su Comunu de Boruta chi punnat a sa realizatzione de un’archìviu...

Atualidade

Sa Sardigna est unu logu galu pagu connòschidu dae sos turistas. Belle su 80% de sos turistas chi arribbat in s’ìsula, difatis, bìsitat isceti su 10% de...