Dae su 9 de abrile, in is prataformas digitales in lìnia, su film a Kentannos, su documentàriu de Víctor Cruz chi, tra Costa Rica, Giapone e Sardigna (tres de is logos de su mundu acanta si bivet de prus), contat is sentidos e is disafios de ogna die de unos cantos giòvanos tzentenàrios chi, a su limenàrgiu de su primu sèculu de vida, e a bias peri de prus, sighint a bìvere comente semper, sena rinuntziare a is disìgios issoro.
Ambientadu in tres de is chimbe “zonas blu” (is àreas de su pianeta acanta s’aspetativa de vida est prus arta de sa mèdia), cun s’agiudu de sa Fondazione Sardegna Film Commission de sa Regione Autònoma de sa Sardigna, Kentannos est unu film chi allegat de sa passione de bìvere e chi, cun carignu, nos ammentat chi s’edade est un’istadu mentale ebbia.
A pustis de s’anteprima mundiale a su Visions du Réel e de sa partetzipatzione a su Biografilm de Bologna, su 9 de abrile, in ocasione de s’essida de su film, su tzicuitu #Iorestoinsala at a acasagiadu un’addòbiu cun su regista Víctor Cruz, su produtore Giovanni Pompili (Kino produzioni), su protagonista de su film, Adolfo Melis e s’iscritora Michela Murgia.
In Costa Rica, sa fìgia de Pachito pensat chi a 98 annos su babbu non siat prus a tretu de pòdere andare a caddu, e duncas chircat de si ddu proibire; in Sardigna, Adolfo pro is 93 annos suos pedit comente regalu de pilotare un’aeroplanu, dae semper su disìgiu suo; in s’ìsula de Okinawa, Tomos, 93 annos, faghet parte de una banda pop, e sighit a andare a tournée in totu su Giapone. “Dae is forestas istremenadas de su Costa Rica, colende in mesu a is cussòrgias de Sardigna, finas a un’iscola de dantza de Okinawa, Víctor Cruz ponet a pare tres contos chi tocant su tema de sa betzesa e de su tempus chi colat- iscriet in una nota Efisia Curreli, vitze-presidente de s’Assòtziu de promotzione de su Tzìnema Sardu ‘Visioni di Ichnussa’ – unu film subra de sa passione de bìvere chi, cun carignu, nos regordat chi s’edade est petzi un’istadu mentale”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
