The Photo Solstice. In Gavoi, Orane e Nùgoro s’allegat de fotografia

Bator dies de initziativas, laboratòrios, atopos e dibatas cun istràngios e personalidades de cabbale pro allegare de fotografia. The Photo Solstice, su progetu de Fondazione di Sardegna intregadu a sa fotografia arribat in su coro de sa Barbàgia.

Sa manifestatzione, cuncordada in s’àmbitu de Ar/S Arte Condivisa in Sardegna a incuru de Marco Delogu cun s’agiudu de su Comunu de Gavoi, su Museu Nivola de Orane, su Museo Man de Nùgoro statzione, s’at a fàghere dae su 17 a su 21 de cabudanni in Gavoi.

S’editzione de ocannu est istada iscostiada dae su solstìtziu de istade a s’ecuinòtziu de atongile, ma s’ispostamentu est fintzas ambientale, bida sa vocatzione culturale manna de is tres comunos interessados in su progetu. Custu balet mescamente pro Gavoi, bidda ativa meda dae unu puntu de annotu culturale e sede de importantes eventos comente su Festival della Letteratura e su World Press Photo, pro nde remonare calicunu ebbia. Pròpiu pro custu The Photo Solstice at a èssere caraterizadu dae unu focus importante siat subra s’acàpiu cun su territòriu, siat cun is fainas pràticas e de produtzione fotogràfica acanta ant a èssere impignados is partetzipantes.

Nàschida in su 2018 in su Parcu Natzionale de s’Asinara, sa de tres editziones de su progetu at a acollire bìndighi partetzipantes seletzionados pro mesu de unu bandu de gara chi ant a èssere partzidos in tres laboratòrios ghiados dae is fotògrafos Tim Davis, Marco Delogu e Pino Musi.

Is traballos ant a cumentzare chenàbura su 17 de cabudanni a Gavoi cun s’inchingiamentu de ‘Commissione Sardegna’, mustra interessante meda de una seletzione de traballos de Delogu, Guy Tillim, e Pino Musi, in espositzione finas a su 21 de cabudanni in s’Ex Caserma Betza, immoe Casa della Cultura. Ocannu a traballare a is pròssimas “Commissioni Sardegna” sunt istados mutidos Olivo Barbieri e Tim Davis, e fintzas Graciela Iturbide pro portare a cumpimentu su traballu suo in s’ìsula. In prus, sa manifestatzione s’arrichit de duas tapas esternas: sa prima in programma sàbadu su 18 de cabudanni in Orane, in is tretos su Museu Nivola,e sa segunda in programma domìniga su 19 de cabudanni in Nùgoro, aparitzada paris cun su Museu MAN in is tretos de su Museo del Costume – duos eventos serales pro arresonare cun su pùblicu e contivigiados dae is duos museos.

“Sa de tres editziones de The Photo Solstice marcat unu càmbiu de passu e una cuntzentratzione prus manna in su ‘traballu in su campu” – at naradu Marco Delogu, fotògrafu e curadore – Pro mèdiu de is vàrias ‘Commissioni Sardegna’ e su traballu de medas partetzipantes a is seminàrios, s’idea printzipale est cussa de istantargiare annu cun annu una colletzione basada subra su raportu tra autores identiràrios meda e su paesàgiu e sa populatzione de sa Sardigna”.

Satisfatu meda pro sa collaboratzione Franco Carta, Responsàbile gestione de su Patrimòniu pro Fondazione di Sardegna e de su progetu Ars, e su sìndigu de Gavoi Salvatore Carta, chi a sutalineadu comente s’initziativa artìstica e culturale de importàntzia internatzionale valorizit sa vocatzione de promotore culturale de sa bidda de sa Barbàgia, impinnada fintzas in s’amparu de s’ambiente.

Sa manifestatzione s’at a acumprire rispetende totu is normas contra s’ispàinu de su COVID-19. Pro nde ischire de prus e pro prenotatziones: http://www.thephotosolstice.com/ FB: @thephotosolstice IG: @photosolstice

[Foto de Marco Delogu]

Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*