Balentia, in sa retza 25 annos de mùsica rap sarda Sa formatzione istòrica de is Balentia pùblicat unu Ep, duos album e su discu de solista de Su Maistu: ant a èssere in lìnia in is prus importantes prataformas digitales.

Is cantzones de is Balentia in lìnia dae su 16 de ghennàrgiu. Sa formatzione hip-hop moguresa at detzisu de pònnere a disponimentu de is ascurtadores amantiosos de rap bona parte de sa produtzione discogràfica de is primos 25 annos de atividade. Ant a essire unu a sa chida dae su 16 de ghennàrgiu is traballos de is Balentia, finas a immoe ausentes in sa retza.

“Fiat dae oritu chi pensaìamus de pònnere in lìnia is traballos betzos nostros”, at naradu Alessio Mura, connotu in s’iscena cun su nùmene de Su Maistu, una de is duas boghes de su grupu. “Si tratat de una parte importante de s’istòria nostra e cherimus chi lompat a totus, prus che totu a is sighidores nostros prus fideles e a is levas noas. Sa mùsica oramai est ‘lìcuida’ e duncas est pretzisu chi siat presente in is canales digitales e de streaming, chi a bellu a bellu, a dolu mannu, nd’at leadu su postu a is butegas de discos”.

Sa publicatzione digitale de is primos discos arribbat a pagos meses dae s’ùrtimu sìngulu de is Balentia “Cali sensu”, pro su grupu prima produtzione publicada petzi in digitale, chi decretat is 25 annos de fainas de sa banda, unu cuartu de sèculu acanta su grupu at prodùidu in istùdiu bator album e un’Ep, at collaboradu cun artistas natzionales e internatzionales, e at fatu prus de 600 cuntzertos tra Sardigna, Itàlia e Europa (Germània, Ispagna, Grètzia). Durante is annos de sa vida sua sa banda at otentu medas crìticas bonas dae s’imprenta ispetzializada (mescamente Rumore e Blow Up), e peri medas passàgios in ràdios e Tv natzionales. At cantadu in palcu cun artistas internatzionales e natzionales comente Orishas, Casinu Royale, Neffa, Piotta, Club Dogo, Colle der Fomento, Dj Gruff.

“Immoe totus ant a pòdere iscurtare is cantzones istòricas nostras in lìnia”, at cummentadu Andrea Mura, s’àtera metade de is Balentia, in arte Lepa, “bastat a intrare in Spotify, Youtube e Itunes. Unu bellu regalu pro serrare in bellesa in primos 25 annos nostros de atividade”. In su canale youtube ufitziale de su grupu  sunt giai a disponimentu su primu album “Nos’e tottu”, e “Nieddu”, ùrtimu traballu discogràficu de sa banda de Mòguru, publicadu in suportu fìsicu e in digitale in su mese de idas de su 2018, presente in totu is prus importantes butegas digitales in lìnia.

Pro primu at a essire s’Ep “Sa Lei/Cantu balit su fueddu”, publicadu in vinile in su 1998, chi aiat 5 branos e bantaiat is collaboratziones de Kd (Christian Diozzi), Kiza (Roberto Marras) e Sapatimaba (Giuseppe Littera e Alessio Podda), e in prus de sa cantante moguresa Tiziana Mandis. In custa fase sa formatzione fiat cumposta dae Su Maistu (Alessio Mura), Lepa (Andrea Mura), Mad F (Francesco Floris) e Su Bruxu (Manuel Lai).

S’àteru sàbadu, su 23 de ghennàrgiu, at a tocare a s’album “Bisendi Disi”: 18 tràtzias e una parte rom cun su vìdeu e contenutos suplementares. S’album mancat s’intrada noa in su grupu de K. Wild e Dj Zep (Andrea Planu), e s’essida de Francesco Floris e Manuel Lai. Essidu sa primu bia in suportu materiale in su 2007 e produidu dae K. Wild (Carlo Gosamo), est su segundu de sa truma moguresa, e at bidu pro sa prima borta, tra is medas, sa partetzipatzione de su rapadore ìtalu/belga Sched, de sa cantante Rossella Faa, de su rapadore Mraxai (Giuseppe Littera), e de is musitzistas Francesco Bachis e Tristano Pala.

Sàbadu su 30 de ghennàrgiu at a essire in digitale su de tres discos de is Balentia, “Vidas & Rimas”, publicadu pro primu in CD in su 2012. S’album, produidu dae K.Wild, si cumponet de 11 branos chi incruint fintzas duos arrangiamentos noos de sa cantzone “Su chi biu”, su primu de Lo.Car (Carlo Addaris) e su segundu de Andrea Aru.

A concruimentu, su 6 de freàrgiu, a ses annos giustos dae sa prima essida ufitziale sua, at a èssere torradu a publicare in digitale “Coranta”, discu solista de Su Maistu. Pro sa produtzione de s’album su rapadore s’est afidadu a un’iscuadra de produtores formada dae Laif, Michele Ibba, Riccardo Lisci, e Andrea Aru: Aru s’est ocupadu peri de sa registratzione, missàgiu e mastering de su discu. A custos produtores s’agiunghet unu suportu mannu pro is testos, gràtzias a sa partetzipatzione de Andrea Mura (Lepa/Balentia), Alessandro Sanna (Quilo/Sa Razza), Giuseppe Littera (Mraxai), e su contributu in is scratch (iscarrànfios) de Alessandro Pintus (Alex P/Crc Posse) e Richard Di Via (DJ Sputo).


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*