In Sardigna s’istade promitet bene. Mancari is dudas dèpidas a su Covid, in s’Ìsula si registrat giai su binti pro chentu de aparauladuras de is domos de vacàntzia, pro su 60 pro chentu si tratat de italianos. A ddu nàrrere est Estay, sotziedade de gestione de domos a pesone pro turistas, fundada in su mese de làmpadas de su 2018 dae chimbe pitzocos sardos.
” Cun totu chi su 26 de abrile, cando su primu ministru Mario Draghi at fatu s’annùntziu, sa Sardigna esseret in zona ruja, s’istitutzione de “passaportu birde” e s’aficu pro pro is aberturas, ant donadu isperu bonu a sa gente, chi s’est traduidu in una crèschida de bìsitas in su situ nostru”, at naradu Giovanni Molinari, unu de is fundadores de Estay. Estay benit impreadu prus che totu dae famìlias e còpias pro permanèntzias chi durant in mèdia 5 dies, cun un’ispesa chi andat dae 100 a 150 èuros a note.
Su nùmeru mèdiu de persones pro permanèntzia andat dae 2 a 4 ma podet arribbare finas a 8-10 persones pro villas o aparauladuras mùltiplas (istruturas cun prus domos in su matessi àmbitu). “Un’àtera clientela de interessu- ispiegant is sòtzios de Estay – est cussa de is gosi narados “repeater”, est a nàrrere clientes afitianados chi torrant in su matessi allògiu pro ite nde sunt abarrados cuntentos e fintzas pro more ca ischint giai ite ddis isetat, massimamente in custu annu de intzertesa”.
“In prus – sighint is fundadores de su situ de aparauladuras – pròpiu pro more de sa particularidade de s’istiu 2021, benint seberadas prus is tarifas mujaditas e chi si podent rimbursare. Nois puru amus ammaniadu un’asseguratzione chi si podet fàghere in su giassu nostru etotu, chi garantit su rimbursu cumpletu fintzas si si burrat sa prenotatzione sa die a in antis de sa data de arribu”. Tra is localidades preferidas, is prus seberadas sunt Crabonaxa e Costa Rei, ma andant bene fintzas Chia, Santa Margherita de Pula e su Sulcis.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
