“Pro is festas, imbetzes de bos ammachiare cun sa Playstation, ispassiade•bos a cumpònnere is modelleddos de is monumentos de sa Sardigna”. Su disafiu a is videogiogos arribbat pròpiu dae sa Sardigna. Unu messàgiu publicadu in Facebook dae un’azienda sarda de modelleddos istàticos nàschida dae pagu at tentu unu muntone de cumpartziduras e prus de 30 mìgia visualizatziones in pagu tempus.
Su paragone chi benit a conca est cussu de Dàvide contra Golia: una realidade imprenditoriale pitica sarda contra su gigante de s’indùstria lùdica mundiale. Unu disafiu interessante a beru. Interessante pro ite a su postu de drones, giogos telecumandados, videogiogos in lìnia “in ue totus ochient a totus” – comente aiat iscritu in un’àteru messàgiu su fundadore de sa dita sarda – benint propostos giogos educativos chi faghent connòschere sa Sardigna antiga. Sa Ccv modelli produet difatis modelleddos de monumentos istòricos de s’ìsula nostra comente su Nuraxi de Barùmini, su nuraghe Arrùbiu de Orroli e s’Altare de Monte Acoddi.
S’ideadore est un’ingegneri, Giorgio Granara. A palas de is cartoneddos de montare, in prus de una progetatzione e produtzione fata totu in Sardigna, ddoe tenet un’istùdiu istòricu e archeològicu atentu. S’azienda aiat printzipiadu cun is riprodutziones in iscala de naes istòricas romanas in linna. Pro more de is costos artos (sa linna est cara meda) pro immoe sa produtzione de is naes s’est firmada e dae su Nadale de su 2019 est incumentzada sa produtzione de modellinos istàticos in cartoneddu de is monumentos archeològicos sardos.
Pro como is modellinos sunt tres, ma “in progetu – faghent ischire dae sa Ccv modelli de Casteddu – ddoe est su nuraghe Losa de Abbasanta. E prus matanosa, bidu chi s’isvilupat belle totu sutaterra, at a èssere sa realizatzione de su modellu de su putzu sagradu de Santa Cristina de Paulle, ma a nois is disafios nos praghent”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
