Un’iscola de tzìnema in una bidda disabitada

Rebeccu, sa bidda disabitada torrat a bìvere cun un’iscola istadiale de tzìnema. Dedicadu a chie tenet prus pagu de 25 annos, is candidaduras si podent mandare finas a su 26 de austu.

Rebeccu, su biddatzolu medievale disabitadu in sa fratzione de Bonolva (Tàtari), si torrat a animare cun una chida de eventos acapiados a su tzìnema. Sa biddighedda pantasma subra su montigru, ammajadora e rica de istòria, bellesas architetònicas e archeològicas, comente sa necròpoli de Santu Andrea Priu, dae su 30 de austu a su 5 de cabudanni at a acollure “Titoli di coda”, iscola de iscritura e produtzione tzinematogràfica dedicadu a is minores de 25 annos.

“Rebeccu est unu logu amajadore – at naradu su sìndigu Massimo D’Agostino – chi a una banda faghet craru in su pranu Santa Lughia, e a s’àtera s’incrarat in is bìngias bonolvesas, a unu tempus fiat unu tzentru importante, ma a bellu a bellu est istadu abbandonadu, comente chi èssere caladu su frastimu de sa printzipessa Donoria, fìgia de su Re Beccu: ‘Rebeccu, Rebecchei dae trinta domos non moveit’, est a nàrrere ‘Chi Rebeccu non apat mai prus de 30 domos”, e gosi est istadu. Torradas a acontzare dae su Comunu cun s’idea de creare, gràtzias a unu bandu, un’albergu difusu, is domos in predamòlina, ant a èssere abertas pro acasagiare is partetzipantes a su campus e is istràngios.

“Titoli di coda” est s’anteprima de su fèstival biagiante “MusaMadre-bisioni|corpi|suoni”, chi posca s’at a iscostiare in is ispàtzios de su Nuraghe Santu Antine de Turalva e in sa zona de su vulcanu istudadu de Itireddu. “Sa punna de custa prima editzione est de creare a in antis de totu una comunidade – ispiegat Valeria Orani, diretora artìstica de sa manifestatzione ammaniada dae Entes locales pro is fainas is Culturales e de Ispetàculu — cherimus torrare a abitare una bidda antiga e abbandonada e nde fàghere unu logu biu de creatzione”.

A curare su campus at a èssere s’artista Tamara Bartolini, agiudada dae s’atore e mùsicu Michele Baronio e dae s’iscuadra de Ostia Film Factory, ghiadu dae Marco D’Amelio, insegnante de regia. Est prevìdida sa traspositzione fìlmica de un’iscenegiadura pro mesu de s’aprendimentu de is diversos limbàgios tzinematogràficos e sa pràtica subra diversos mèdios de ripresa pro ràdiu e televisione comente telecàmeras, istabilizadores portàtiles, drones e dispositivos àudiu. Cada sero, is traballos ant a serrare cun “L’Aperitivo giornaliero”, momentu de addòbiu cun su regista Gianfranco Cabiddu, sa costumista Stefania Grilli, sa produtora Martina Rojas Chaigneau, s’atora Cristina Donadio. Mòderat, cun sa condutzione de Tamara Bartolini.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*