Est nàschidu “Space9_MIdI, Museu Immateriale de s’immàgine”, su primu museu in Sardigna dedicadu a s’arte de sa fotografia. Est semper abertu, pro intrare non si pagat su billete e si podet bisitare sena essire dae domo, pro ite est in sa retza ebbia. Pro ddu bìdere bastat a intrare in su giassu internet www.space9.it. Su progetu est frutu de un’idea de Sonia Borsato, diretora de Su Palatu, polu culturale de sa fotografia sarda fundadu in Biddanoa Monteleone dae Salvatore Ligios, e Giovanni Follesa, giornalista e iscritore, dotzente in s’Acadèmia de Bellas Artes de Tàtari.
In s’ispàtziu virtuale s’ant a pòdere ammirare is espositziones temporales e una Colletzione permanente formada dae prus a mancu de milli òperas de prus de chimbanta autores mescamente sardos. “Totus paris – ispiegant is fundadores de su museu – fòrmulant unu fràigu identitàriu chi est a tretu de lèghere sa cuntemporaneidade pro mèdiu de s’ogru de sa fotografia in Sardigna, chi in Space9 s’incaresset a una cussèntzia universale aberende•si a su diàlogu cun su mundu, donende cura prus che totu a is Paisos de su Mediterràneu”. Tra pagu at a èssere disponìbile fintzas su puntu de bèndida de libros e ogetìstica museale. S’idea est de 2017. “Giai primu chi s’iscasiddaret custa pandemia chi at corpidu totu su mundu, aìamus pensadu de catalogare is giòvanos fotògrafos de sa Sardigna e de pònnere is òperas issoro in unu logu virtuale, a manera de ddas fàghere connòschere e presentare a unu pùblicu prus mannu, barighende in modu digitale is làcanas de s’Ìsula”.
DE SU MATESSI ARGUMENTU: Chimbe fotografias chi contant sa ‘bellesa’ de sa terra nostra
In su mentres, finas a su 12 de abrile, est istada cuncordada sa mustra temporale de inchìngiu “Confini/Orizzonti Meditazioni Mediterranee”. Su percursu s’artìculat pro mèdiu de parte de is òperas postas in sa colletzione permanente de Space9 – MidI, seberadas dae is curadores Borsato e Follesa, is iscatos de carchi fotògrafu sitzilianu e unu traballu fatu in Catalugna dae Myriam Meloni e Arnau Bach. “Sa mustra – sutalìniant sos duos curadores – naschet dae sa voluntade de istruturare unu diàlogu tra Sardigna-Sitzìlia-Bartzellona, cun sa cussèntzia de èssere tapa netzessària in unu mare de geografias e in sa responsabilidade de lèghere su Mediterràneu chi, pro natura sua, unit e istàgiat, donat e leat, contat e si calliat a sa muda”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
