Sa Sardigna tzèlebrat su carrasegare cun eventos dae un’ala a s’àtera de s’ìsula. Dae sos ritos pigados dae sa vida agropastorale a sas isfiladas allegòricas, cada comunidade tzèlebrat su carrasegare segundu sas costumàntzias pròpias. Sas festas, inchesas dae sos fogos (o fogorones) pro Sant’Antoni in ghennàrgiu, sighint su mese de martzu.
In su coro de sa Sardigna, su Màrghine e sa Barbàgia s’ànimant cun sos carrasegares traditzionales in Macumere, Teti, Ulìana e Nùgoro. Àteros addòbios chi non si podent pèrdere sunt “Carazzas” in Àldara (22 freàrgiu), in Gáiru su 22 de freàrgiu cun Su Marti Perra, su carrasegare istòricu de Mamujada (2 e 4 martzu), e sas tzelebratziones de Otzana (2 martzu), Oroteddi, Orane (9 martzu), Ollollai (1 martzu), Gavoi (27 freàrgiu) e Ovodda (5 martzu). In s’Aristanesu, Ula (cun s’Urtzu), Samugheo (16 freàrgiu), Paùlle e Neoneli (16 martzu) oferint unu biàgiu in sas traditziones prus arcàicas.
Tèmpiu si distinghet pro “Lu Carrasciali Timpiesu”, unu de sos carrasegares allegòricos prus de importu de s’ìsula, chi si concruit su 4 de martzu. Medas tzitades e biddas comente S’Alighera, Nughedu Santu Nigola, Pèrfugas, Sènnaru e Tissi sunt invàdidas dae carros allegòricos e caratzas. Fintzas in su Mèdio Campidanu (Àrbus, Gonnos, Gùspini, Samassi, Santu ‘Èngiu, Terraba, Marrùbiu), s’Ogiastra (Barì, Tortolì, Biddamanna Strisàili), su Campidanu (Casteddu, Cuartu Sant’Aleni, Sìnnia, Sestu) e su Sulcis (Igrèsias, Carbònia, Santu Antiogu, Biddamassàrgia) oferint isfiladas e festas.
Fonte: Regione Sardegna
Sa Sardigna tzèlebrat fintzas su ligàmene cun su mundu ecuestre pro mèdiu de sos carrasegares “a caddu”. Paulle (8 e 9 martzu), Santulussùrgiu (2 e 4 martzu), Iscanu e Bonorva sunt famados pro sas giostras. Sa Sartiglia de Aristanis (2 e 4 de martzu) est su carrasegare ecuestre prus famadu de s’ìsula.
Su Carrasegare de Bosa, “Su Carrasegare ‘Osincu”, rapresentat un’ammisituru intre traditzione e modernidade. De non pèrdere su 22 freàrgiu cun sas caratzas tìpicas e su 4 martzu cun s’Attittidu e sa cassa a Giolzi.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
