Sighit sa passione pro is libros bonos, pro is atopos cun is iscritores de totu su mundu e pro is dibatas chi afrontant diversos temas de literadura, mescamente a pustis de un’annu che a su chi amus coladu. Est pròpiu pro custu motivu chi ocannu puru torrat su fèstival literàriu Éntula, s’apuntamentu de s’assòtziu Lìberos chi dae su 2012 faghet addobiare iscritores e pùblicu in is logos prus ammajadores e pragherosos de totu s’ìsula.
Peri custa editziones chi comintzat in abrile, oramai semus a sa nùmeru noe, chi at a andare a in antis pro totu s’annu finas a nadale, s’at a fàghere siat in lìnea, cun atopos in videocunferèntzia, siat in presèntzia, mescamente in is meses istiales, isperende in unu megioru de sa situatzione sanitària. “Un’annu a oe, nemos diat àere iscumìtidu chi diamus èssere resèssidos a fàghere su fèstival in presèntzia, ma però totu s’istade fìamus presentes in is pratzas de sa Sardigna, cuntzentrende is atopos in lìnea in s’atòngiu ebbia”, at naradu Francesca Casula de s’assòtziu Lìberos, chi at agiuntu: “Immoe tenimus unu vantàgiu prus mannu, ischimus ite podet sutzèdere e semus prontos a immaginare iscenàrios noos e diversos. Ischimus chi sa gana de nos addobiare est meda e iscamus fintzas comente a nos amparare. No est cosa de pagu contu custa. Isperamus chi s’interessu chi amus agatadu s’annu coladu in is biddas acanta semus istadu si potzat siat rinnovare ocannu puru. Medas comunos nos ant giai torradu isceda e is autores ant giai donadu sa disponibilidade issoro, prova chi, leende totu is premunimentos netzessàrios, si podent aparitzare eventos in presèntzia”.
Protagonistas de Éntula 2021 una trintina de autores de su panorama sardu, natzionale e èsteru e is ùrtimos traballos issoro – unos cantos publicados dae pagu e àteros chi ant a essire in is meses imbenientes. Grandu isetu pro Sandro Veronesi, binchidore duas bias de su prèmiu Strega, pro Donatella Di Pietrantonio, issa puru pluripremiada, pro su Cacciatore di aquiloni sirianu Zeyn Joukhadar, pro su diretore de su Salone Internatzionale de su Libru de Torinu Nicola Lagioia, pro Nadeesha Uyangoda impinnada dae semper subra de is temas de identidade, ratza e migratziones, e pro Viola Ardone, autora de su casu literàriu Il treno dei bambini.
Una trintina peri is biddas chi ant a èssere tocadas dae su biàgiu de Éntula dae unu càbudu a s’àteru de sa Sardigna, cun sa punna de iscobèrrere siat sa richesa culturale e paesagìstica fintzas de is biddas minores, siat de afortigare, pro mèdiu de su fèstival, s’oferta turìstica difusa: a parte is tapas istòricas de Fonne, Fordongianus, Turri e Codaruina, ddoe ant a èssere peri Casteddu, Macumere, Monteleone, Nulvi, Nùgoro, Aristanis, Piaghe, Portu Turre, Sarule, Tàtari, Serri, s’Unione de is Comunos de sa Barbàgia e Biddanoa Forru, e in prus, pro sa primu bia, tres biddas ogiastrinas, Baunei, Orthullè e Biddamanna Strisàili.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
