Su tennis pro is persones chi non bident

Fintzas is persones chi non bident podent giogare a tennis. Ddu dimustrat su progetu de s’assòtziu isportivu Tennis Club Sciola in Santu Sparau. Is cursos, a pustis de unas cantas dies dimustrativas, ant a comintzare in manera ufitziale su 31 de maju. Ma de ite si tratat? Su ‘blind tennis’ est una disciplina belle disconnota in Itàlia, is chi dda pràticant sunt belle trinta, e est dedicada a is persones cun disabilidade visiva. Est comente su tennis ma cun unas cantas particularidades.

Su ‘Blind tennis’ naschet in Giapone in is annos ’80. S’annu coladu diat àere dèpidu fàghere s’esòrdiu suo in is giogos paralìmpicos de Tòkyo comente isport isperimentale. Bidu chi in s’Ìsula nostra una realidade che custa no esistet, su Tennis club Sciola proponet de nde ddu batire fintzas in Sardigna, printzipiende dae Santu Sparau.

Sa diferèntzia cun su tennis traditzionale est sa longària de su campu, prus piticu e limitadu cun cun funes in rilievu, chi permitit a su giogadore de intèndere e cumprèndere in ue s’agatat. Diferente fintzas sa rete, prus bàscia, e sa botza pitica chi sonat. Un’àtera diferèntzia est cussa de is ispetadores chi depent abarrare tzitidos pro fàghere intèndere su sonu de sa botza a is giogadores.

“In s’ìsula istrutura adatas non nche nde tenet – ddoe est iscritu in su progetu de su tzìrculu de tennis Sciola -, duncas s’assòtziu nostru si proponet de avalorare s’isport e mescamente su tennis comente momentu de iscoberta de su potentziale de is persones pro mèdiu de sa creatzione de un’ispàtziu e de atividades isportivas. A agiudare is atletas ddoe at ant a èssere figuras professionales cualificadas: istrutores de tennis, psicòlogos e educadores. Su progetu dedicadu non escludet persones cun àteras disabilidades, fìsicas e psìchicas, chi presentant prus dificultades a abarrare in unu cuntestu isportivu e sotziale”.

Intramesu de is atividades ant a èssere cuncordadas dies in is iscolas e manifestatziones acanta is persones normodotadas ant a èssere fatzoladas pro provare a giogare giogare a tennis sena bìdere.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*