Un’istatuedda rara de brunzu, de su periòdu nuràgicu est istada agatada in Nughedu Santu Nigola. L’at fatu a ischire chenàbura coladu sa Subrintendèntzia de Tàtari e Nùgoro durante sa presentada a su pùblicu de sos resurtados de sa campagna de iscavos archeològicos chi s’est acumprida intre sos meses de santugaine 2019 e làmpadas 2021.
Tra sos vàrios repertos iscobertos su prus important est su brunzetu a figura intrea. “Rapresentat – faghet a ischire s’ente de su ministeru a sos Benes culturales – unu gherreri a gunnedda e cun un’elmu, a pilos longos intritzidos e unu pugnale in petorras, chi in sa sotziedade nuràgica fiat singiale de su crompimentu de s’edade adulta”. Tra sos àteros repertos, chi sunt istados intregados a su tzentru de restàuru, unu bìculu de ispada votiva, un’agùgia, un’istilete, un’aneddu de brunzu e su cantu de un’arcu.
Su cumplessu de Cuccuru Mudeju est istadu interessadu dae una campagna de iscavu e restàuru ghiada dae su Comunu cun sa diretzione sientìfica de sa Subrintendèntzia de archeologia. Mancari su situ siat istadu murigadu meda durante sos annos dae sas fainas agrìculas, sos archeòlogos ant iscobertu unu muru chi istàgiat unos cantos aposentos e duos basamentos in pedra pro sas ofertas votivas.
“Sos èsitos de sa campagna de restàuru e iscavu – iscriet sa Subrintendèntzia – cunfirmant s’importu de su santuàriu e dimustrant sos resurtados òtimos cròmpidos gràtzias a sa sinergia tra su Comunu e sa Subrintendèntzia. Sos acatamentos nos dant un’istantànea de sa chi fiat sa religiosidade nuràgica tra s’edade de su Brunzu Finale e su cumintzu de s’edade de su Ferru”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
