Sa tundimenta de is berbèghes in Sardigna contada in unu libru fotogràficu. Dd’at iscritu Francesco Pintore giornalista e fotògrafu. S’òpera est istada presentada in su BìFoto fèstival internatzionale de sa fotografìa de Mòguru.
Su progetu, pubblicadu dae Abba Edizioni, regollet chimbe annos de fotografìas realizadas dae s’autore e naschet cun sa punna de documentare su trebballu de is pastores in s´Ísula. In custu tempus Pintore at contadu duos argumentos chi pertocant is sartos nostros: s’avolotu de is pastores (su 2019) e su contu a fotografias de sa tràmuda de su bestiàmene dae Désulu a Làconi.
Como tocat a sa tundimenta de is berbèghes, unu costumu antigu meda chi in Sardigna, dae is primos annos Otanta de su séculu coladu, cun s’arribbu de pastores frantzesos e neozelandesos in Sardigna at connotu unu mudamentu tecnológicu e antropológicu de importu.
In su libru is immàgines, bortadas in biancu e nieddu, descrient sa fase de sa tundimenta: si podet bìdere sa pelea de is pastores, is ainas tecnològicas e lamas imprendas ma finas momentos comente sa regorta de sa lana o cando is pastores si pasant e giogant a sa murra. Is fotografìas benint acumpangiadas dae testos chi ispiegant comente est mudende custu ritu chi in is annos est diventadu finas unu trabballu cun iscuadras de tundidores chi in s’istade andant in medas aziendas de sa Sardigna.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
