It’est sa campagna de A Foras “Prus ispidales prus pagu militares”

A Foras, movimentu contra s’ocupatzione militare de sa Sardigna, est torradu a si fàghere intèndere. Cun una fiacolada ammaniada domìniga in sa pratza de Quirra in Casteddu at manifestadu sa solidariedade sua a mèigos, infermieris, operadores sòtziu-sanitàrios chi in custu annu difìtzile ant lutadu e lutant totora contra sa pandemia “in una situatzione de mancàntzia crònica de mezos e istruturas”.

Sa campagna ‘Prus ispidales prus pagu militares’, cumentzada in su mese de abrile de ocannu, at postu a craru is contradditziones prus ladinas de un’Istadu chi, narant is de A Foras, pro prus de deghe annos at investidu in s’economia militare, at donadu ispàtzios, territòrios e infrastruturas a sa màchina bèllica, a dannu de su setore sanitàriu pùblicu. Is dis-investimentos de cunseguèntzia diant aere causadu “sa serrada de una sèrie de presìdios sanitàrios locales e repartos e ant indebilitadu su deretu a sa salude de is sardos”.

Unu manifestu de sa campagna de A Foras.

“S’addòbiu – est iscritu in una nota de imprenta – bolet donare tretu a is chèntinas de persones chi benint dae totu sa sotziedade tzivile sarda, chi ant contribuidu in prus ocasiones a sa resèssida de custa campagna. Dae sa manifestatzione de Cabu Frasca contra is esercitatziones militares finas a sa mobilitatzione pro agiudare sa bidda de Bitzi corfida dae s’undamentu de su 28 de onniasantu, A Foras torrat in is caminos sardos pro cungiare un’annu de mobilitatziones e pro s’aprontare a is disafios de su 2021”.

A s’agabbu de sa manifestatzione una banda pitica de is manifestantes at lòmpidu a suta de s’ispidale Santìssima Trinidade pro torrare gràtzias cun un’istriscione a is traballadores de su presìdiu sanitàriu.

Sa fiacolada in sa pratza de Quirra in Casteddu.

E afirmare torra unos cantos de propostas chi faghent: “Una moratòria a pitzu de totu is esercitatziones militares, in prus pedimus chi sa Regione e s’Istadu non finàntziet prus progetos ùtiles a is fortzas armadas ebbia e a is indùstrias de su setore bèllicu. Pro esempru, pedimus chi si firmet su finantziamentu de su progetu Siat de Teulada, su co-finantziamentu pùblicu de sa prataforma pro is proas de is motores missilìsticos in su Polìgonu de Cirra e su co-finantziamentu de su progetu Caserme verdi, chi interessat is tres casermas de s’Esèrtzitu in Casteddu e sa de Teulada. Pedimus chi su dinari risparmiadu gràtzias a is primos duos puntos siat torradu a investire in s’afortigamentu de sa sanidade pùblica sarda”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*