Arrèxini est su primu fèstival de cultura e limba sarda

Si mutit Arrèxini su primu fèstival de limba e cultura sarda chi s’at a fàghere in duos Comunos de s’ìsula: duas datas pro sos eventos de Biddanoa Forru, su 24 e 25 de trìulas, e àteras duas in Ussaramanna su 31 de trìulas e su primu austu. Sa punna de sa manifestatzione est promòvere sa literadura, sa mùsica, su tzìnema e su teatru cuntemporàneu, impreende su sardu.

Pro cada die de su fèstival est prevìdidu una regionada: sa primu – in Biddanoa Forru, in sa sala de sa Biblioteca comunale – s’intìtulat ‘Su tempus benidore de is lìnguas in Sardigna’, acumpangiadu dae sa presentada de su libru ‘A dies de oe. Annotos pro una limba sarda tzìvica e cuntemporànea’ de Giuseppe Corongiu, cun sa partetzipatzione de Antonello Garau, Enrico Putzolu e Giusy Fanti. Sa segunda at a èssere su 31 de trìulas, subra su tema “S’istòria de sa Sardigna”, cun Isabella Tore, Manuela Ennas, Annarosa Corda e Maria Barca. Sa primu die (su 31 de trìulas), in Ussaramanna s’ant a addobiare sos editores chi pùblicant in limba sarda.

In Biddanoa Forru ant a èssere presentadas fintzas duas òperas musicales e literàrias. Su 24 de trìulas at a tocare a Rossella Faa cun su libro suo “Bella bella”, acumpangiada dae Giacomo Deiana, Nicola Cossu e Elio Turno Arthemalle; su 25 de trìulas Ivo Murgia at a presentare “Malamanera” de Malasorti. At a sighire sa projetzione de su film “L’Agnello” de Mario Piredda.

In Ussaramanna su 31 de trìulas sos amministradores de sos Comunos de sa Sardigna, coordinados dae Giovanni Runchina, s’ant a adobiare pro faeddare de s’impreu de sa limba sarda in sas istitutziones. Semper in Ussaramanna at a èssere protagonista fintzas su teatru. Su 31 de trìulas at a andare in iscena “Sa scomùniga de predi Antiogu”, de sa Cumpangia Teatro Marmilla, e su primu austu at a tocare a Il Crogiuolo: Rita Atzeri, Isella Orchis e Cesare Saliu ant a lèghere “Seus cannas e sa sorti est su bentu”, dedicadu a s’òpera de Grazia Deledda, in s’annu de sas tzelebratziones pro sos 150 annos de sa nàschida de su Prèmiu Nobel.

In su fèstival b’at a èssere tretu meda fintzas por sa mùsica. Su 24 de trìulas ant a artziare subra su palcu Reverendo Jones e Randagiu sardu, presentados dae Alessio Mura, chi ant a serrare sa die cun unu seberu de discos fatos in Sardigna. Sa note de su 25 de trìulas at a replicare cun su dj set de Arrogalla. In Ussaramanna, su 31 trìulas ant a serrare sa serada sos Brinca, mentras su primu de austu b’ant a èssere Andrillo e Claudia Aru.

Su Babel Film Fèstival at a curare bator dies de projetziones a tema e sas cooperativas de su territòriu ant a ammaniare bìsitas ghiadas in sos tzentros de Biddanoa Forru e Ussaramanna, in sos museos e in sos nuraghes.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*