Bi sunt finas 14 binos sardos in sa lista ‘Tre Bicchieri 2022’ de su Gambero Rosso, sa revista enogastronòmica chi ogni annu prèmiat sas cantinas chi produint su binu prus bonu in Itàlia.
Segundu sos espertos su vantàgiu de sa Sardigna est in su territòriu suo: “Est aici dae una pariga de annos ma in sos ùrtimos est meda prus craru: s’ìsula est una regione cun territòrios vàrios, diversos meda tra issos, chi mancari bèngiant coltivadas sas matessi variedades, custas s’espressant cun ateretanta diversidade. In prus tocat a tènnere contu de sas ànimas de sos bingedos traditzionales chi dant fortza a ogni cussòrgia”.
Ma pròpiu pro more de custa variedade, in sa presentatzione de ocannu b’est iscritu ca tocat a reformare sas ‘Denumenatziones’ de sos binos: “De manera chi sos territòrios essant prus a pìgiu gràtzias a disciplinares chi sigant s’atualidade de sa viticultura e, de cunsighèntzia, fintzas sas etichetas de sos binos potzant comunicare in manera crara sas sensatziones chi si podent intèndere bufende sos binos”.
Binos premiados cun su tìtuli ‘Tre bicchieri’
- Alghero Cabernet Ris. Marchese di Villamarina 2017 Sella & Mosca
- Cannonau di Sardegna 2019 Corda
- Cannonau di Sardegna Cl. Dule 2018 Gabbas
- Cannonau di Sardegna L’Ora Grande 2019 Contralta
- Carignano del Sulcis 6Mura Ris. 2018 Giba
- Carignano del Sulcis Sup. Terre Brune 2017 Santadi
- Nuracada 2019 Audarya
- Sobi 2019 Bentu Luna
- Turriga 2017 Argiolas
- Vermentino di Gallura Petrizza 2020 Masone Mannu
- Vermentino di Gallura Sup. Maìa 2019 Siddùra
- Vermentino di Gallura Sup. Sciala 2020 Surrau
- Vermentino di Sardegna Stellato 2020 Pala
- Vermentino di Sardegna Tuvaoes 2020 Cherchi
Pro su chi pertocat su binu biancu, Gambero Rosso tra sas cantinas pigat in cunsideru sa de sa Gaddura, de Usini e de Serdiana. Ma finas produtziones prus minores comente su Nuragus de Casteddu, su Semidano de Mòguru o su Torbato de S’Alighera, “sena ismentigare sos bingedos mannos de sa vernàcia, malvasia e nasco, protagonistas in Aristanis, in Bosa, in su Partiolla e in medas àteras zonas. Su muscadeddu (moscato) donat semper resurtados òtimos”.
In Sardigna però su binu chi otenet resurtos prus mannos est su nieddu: “Non faghet a crèere comente sas diferèntzias de su Cannonau siant medas e comente sigant sas diversidade de terra e microclima chi cambia iscostiendesi dae Serdiana a Mamujada, dae Ulìana a Monte. Posca b’at su Bovale chi est andende bene meda siat in sas zonas istòricas (Terrarva e Mandrolisai) siat in àteras zonas in ue est dimustrende su balore suo (prus che totu Marmidda). Su Carignano dat su mègius si otentu dae sarmentos betzos a ‘piede franco’, mentras su Cagnulari agatat s’habitat preferidu suo in su nord-ovest. Concruimus custa panoràmica curtza mentovende su Nieddera de sa provìntzia de Aristanis e su Mònica in sa provìntzia de Casteddu e tenimus unu cuadru mìscrinu a beru. Gasi comente est mìscrina sa bìngia betza dae sa cale naschet su Sobi, binu de sa cantina Bentu Luna, a Neunele”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
