In sa Die de sa terra unu documentàriu pro s’amparu de sa Sardigna

Eris a is 9 de sero, in ocasione de sa Die de sa Terra, s’assòtziu Assemblea natzionale sarda (Ans) at trasmìtidu in prima bisione su documentàriu: “Sardegna: la difesa di un paradiso“, una produtzione Lion’s Lab e cun sa regia de Carlo Gaspa.

Unu documentàriu de denùntzia a pitzu de s’industrializatzione in Sardigna e is cunsighèntzias suas, ma fintzas cun una proposta de unu modellu sustenìbile nou. Unu progetu coerente cun is obietivos de Ans- si podet lèghere in sa pàgina facebook de s’assòtziu- Ripristinamus sa terra, pensamus in paris a unu benidore nou pro sa Sardigna

In su documentàriu, partzidu in 4 capìtulos, benint espostos is datos graves de is tumores in is zonas prus industrializadas de s’ìsula: Portovesme, cun s’istabilimentu de Euroallumina, Macumere, cun is duos inchinisadores de Tòssilo, Sarrocu, cun sa rafineria de sa Saras, e Fiumesanto, cun sa tzentrale elètrica de s’Eni. Su documentàriu de denuntzia “Sardegna: la difesa di un paradiso” , contat su protzessu de industrializatzione e deindustializatzione de s’ìsula, cun is cunsighèntzias suas subra de s’ambiente e subra sa populatzione.

Su docufilm, nàschidu in sa retze cun una regorta fundos, est su resurtadu de unu traballu longu realizadu dae una truma de registas indipendentes, sete pitzocos unidos dae sa passione pro su tzìnema, pro sa contra-informatzione e fintzas dae vitzendas personales e familiares comunas: is istòrias de su luamentu e de s’impatu ambientale si subraponet a is iscenàrios de una Sardigna ìnnida e lìmpia, comente su Supramonte de Orgòsolo, Monte Corrasi de Ulìana e s’àndala escursionìstica “Selvaggio Blu” de Baunei, finas a arribbare a Monte Limbara, acanta ddoe est s’ex base Usaf.

Sa pellìcula si serrat cun unu messàgiu de grandu isperàntzia, dedicadu a is Sardos, cun s’augùriu de un’isvilupu sustenìbile de sa Sardigna, rispetosu de sa salude de is persones e de s’ambiente.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*