Best – Biking Experience Sardinia Tourism est sa prima rete sarda de albergos pro tziclistas nàschida pro si gosare, pedalende, is prendas istòricas, naturalìsticas e enogastronòmicas de sa Sardigna.
Est nàschida Best – Biking Experience Sardinia Tourism, una rete pro promòvere su tziclu-turismu in Sardigna, fintzas cun is bitzicletas elètricas. Su progetu interessat 25 operadores de 14 Comunos, tra custos fintzas duos albergos difusos, un’agriturismu, tres sotziedades de nolègiu de bitzicletas e escursiones, un’agentzia turìstica, una sotziedade de trasportos e tres cantinas pro creare sinergias cun sa filera agrìcula.
Capufila de sa rete est s’imprendidore Guglielmo Machiavello de s’albergu difusu Villa Asfodeli de Tresnuraghes, unu bici-hotel chi giai dae unos cantos annos at investidu in su tziclu-turismu, partetzipende una pariga de collaboradores chi oe sunt presentes in sa rete. Sa fortza de su progetu, de su cale faghent parte is comunos de S’Alighera, Bosa, Crabas, Casteddu Sardu, Aristanis, Portu Turre, Istintinu Tresnuraghes, Biddanoa Monteleone, Gùspini, Macumere, Santu Lussùrgiu, Ula e Tàtari, est s’acàpiu cun su setore agrìculu gràtzias a sa presèntzia in sa rete de tres cantinas, chi cun is produtos Doc issoro rapresentant de tres territòrios diferentes: S’Alighera cun su Torbato, sa Planàrgia cun sa Malvasia, Aristanis cun sa Vernaccia.
Tres binos biancos de avalorare cun su tziclu-turismu, gràtzias fintzas a s’interessamentu de su “Consorzio del Pecorino Romano” de Macumere presente in is mercados nordamericanos, semper prus interessados a s’oferta tzicluturìstica de sa Sardigna.
Is percursos ant a èssere torra progetados pro pònnere in collegamentu totu is nodos de sa rete chi tocat is provìntzias de Tàtari, Nùgoro, Aristanis e Sud Sardigna. S’idea at conchistadu su primu postu in sa graduatòria de su bandu “Turismo, cultura e ambiente – Sardegna, un’Isola sostenibile” de Sardegna Ricerche, s’agèntzia de sa Regione chi donat coddu a is impresas e a s’innovatzione in s’ìsula.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
