Finas custu est isport. Pònnere a contratu unu giogadore mancari isse non potzat giogare. Custu at fatu sa Dinamo Basket oferende unu cuntratu nou pro Achille Polonara, giogadore de basket chi como est parande fronte a una maladia.
Unu gestu de coro cuddu annuntziadu dae sa sotziedade tataresa pro ite a Polonara, 33 annos, in su mese de làmpadas dd’aiant agatadu una leutzemia mieloide e como est afrontende s’isfida prus importante de sa vida sua. “Non bido s’ora de torrare”, custas sas primas paràulas giradas a sos tifosos chi in deretura ant acollidu sa noa cun ispantu.
Polonara aiat giai bestidu sa màllia de sa Dinamo una pariga de annos a oe, dae su 2017 a su 2019, bivende duas istajones memoràbiles: sa conchista de sa Fiba Europe Cup, una caddigada finas a sa finale iscudetu e sa crèschida chi lu diat àere posca giutu a s’Eurolega. In sos ùrtimos ses annos at difatis giogadu cun sas màllias de Baskonia, Fenerbahce, Efes, Zalgiris Kàunas e, de reghente, Virtus Bologna, afirmende·si comente unu de sos giogadores italianos prus apretziados a livellu internatzionale.
De importu pro sa torrada de Polonara in Sardigna est istadu su ligàmene costruidu in su tempus cun sa sotziedade de Tàtari. Su presidente Stefano Sàrdara, s’amministradore delegadu Francesco Sàrdara e su diretore generale Jack Devecchi ant traballadu in mudìmene, alimentende unu raportu de istima e aficu retzìprocu. Sa Dinamo, est iscritu in una nota, connoschet sas dificultades chi Achille est rugrende però creet a manera firma in su percursu suo de recùperu e in su contributu tècnicu e umanu chi at a pòdere dare cando at a torrare.
“Achille at a agatare in Tàtari un’ambiente familiare pro sighire sa carriera sua cun serenidade”, ant ispiegadu dae sa sotziedade, sutaliniende chi s’allenadore Massimo Bulleri e sos cumpàngios sunt prontos a l’acollire.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
