‘Respetu’: arte pùblica in is muros de Barì

Is artistas lassant Barì e tra is caminos de su comunu ogiastrinu, abarrat s’arrastu de unu progetu chi abbaidende su presente, mirat a unu benidore fatu de consièntzia e de respetu.

Est concruidu custu coa de chida s’eventu “Tra muro e mare”, progetu de arte pùblica aparitzadu dae Home Network (rete de artistas de Urban Center) cuncordadu cun su contributu de s’Unione de is Comunos de s’Ogiastra e de su Comunu de Barì. Oto artistas de s’iscena sarda, natzionale e internatzionale (Bastardilla, Crisa, Paola Corrias, Ericailcane, Daniele Gregorini, Marcello Marinelli, Marco Rea, Skan) ant bìvidu una chida sa bidda ogiastrinu de Barì pro interpretare in is muros de su tzentru abitadu su tema seberadu dae s’amministratzione comunale pro sa manifestatzione, est a nàrrere su”respetu”.

“Sa punna – at decraradu s’amministratzione comunale – est cussa de furriare is caminos de su tzentru de Barì in unu museu a chelu abertu, a s’internu de unu percursu chi acumpanget is bisitadores fatu de is monumentos prus bisitados sa bidda, comente sa crèsia de Santu Leonardu, sa de Santa Cecìlia e cussa prus famada de sa Munserrada”.

Duncas, tra is caminos de sa bidda, is artistas ant interpretadu su cuntzetu de respetu in oto diversos muros, cuntzèdidos dae sa colletividade pro sa colletividade, cun s’iscopu de afidare fintzas a is caminos su còmpitu de contare e dialogare, pro mèdiu de s’arte. “Semus satisfatos meda de comente est andada sa manifestatzione” at naradu Daniele Gregorini, diretore artìsticu de Home Network, chi at agiuntu: “Sa cosa positiva est chi sa comunidade ogiastrina tenet pràghere a tènnere istìmulos culturales, prus che totu de s’arte cuntemporànea: si tratat de traballos chi rapresentant cuntzetos in veridade bastante abertos a s’interpretatzione, pro is cales sa gente chircat de cumprèndere ite est bidende; sunt totus mecanismos chi induiant is persones a tènnere un’ispìritu prus crìticu in is cunfrontos de sa realidade”.

Is reatziones sunt istadas opostas, ma belle totus ant apretziadu su progetu: “Amus chircadu de batire a Barì diversos livellos de limbàgiu artìsticu – at sighidu a contare Gregorini – bènnidu dae diversas àreas geogràficas de su mundu: b’aiat 5 sardos e un’artista vènetu, unu romanu e una colombiana, totu pro chircare de arribbare a unu limbàgiu artìsticu chi esseret su prus su prus possìbile cumprensìbile e de valore; su resurtadu difatis est unu percursu eterogèneu acapiadu a su tema de su respetu ma chi cumprendet diferentes interpretatziones”.

Sa declinatzione de su cuntzetu protagonista de “Tra muro e mare” s’est espressada tochende vàrios argumentos: su dissensu in is cunfrontos de s’opressione, is traditziones chi ponent is bases de sa sotziedade nostra, s’importu de un’abbratzu o de sa luta contra sa violèntzia de gènere. Tra is artistas ddoe fiat fintzas Marcello Marinelli, sa cale òperat surreale elàborat su tema de su respetu pro mèdiu de sa rapresentatzione de “una natura morta de pipas”. “Is pipas – at ispiegadu s’artista – podent èssere unu riferimentu a una figura de una tzerta sabiesa, a sa sabidoria, a is bardianos betzos de sa cultura nostra; s’òpera at a trasmìtere sa chi is matessi betzos pintados in s’òpera t’ant a bòlere contare; su muru est un’invitu a pompiare a is esperièntzias e a sa cultura chi arribbat dae su passadu cun respetu mannu”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*