Turistas comente pastores in is àndalas de sa tràmuda Unu progetu bolet fàghere connòschere is caminos de una pràtica millenària chi galu esistit in Àrthana e in Biddamanna.

Foto de Anna Piroddi

Is àndalas antigas de sa tràmuda, is postòrgios acanta is pastores faghiant tapa cun su bestiàmene, is camineddos tramandados dae babbu in fìgiu e is bados acanta si giumpaiant is rios, podent èssere torrados a iscobèrrere e torrados a impreare fintzas pro su turismu. Custa est sa punna de unu progetu a tìtulu “I cammini della transumanza” chi bolet valorizare is percursos antigos de sa tràmuda in Ogiastra.

Galu oe, is pastores de Àrthana e de Biddamanna costumant a ierrare cun su bestiàmene in marina e in beranu torrant a essire a su monte. S’idea est istata cuncurdada dae s’assòtziu Ogliastra Eventi, chi in custos annos at acumpridu unu traballu a pitzu de sa longevidade e  bolet fàghere connòschere custa usàntzia millenària dae sa boghe de is pastores arthanesos e biddamannesos etotu, chi sunt is ùnicos abarrados a portare a in antis custa pràtica. Is contos de is pastores ant a èssere postos in una guida chi at a permìtere de fàghere connòschere e valorizare in totu su mundu, dae su puntu de bista naturalìsticu e escursionìsticu puru, is logos tocados dae sa tràmuda. In prus, is intervistas ant imbucare a fàghere parte de un’ispetàculu teatrale chi at a impressionare e interessare su pùblicu a una realidade culturale de sa Sardigna, ma chi s’agatat fintzas in àteras regiones de su mundu.

Sa candidadura de sa Tràmuda a patrimòniu culturale immateriale de s’Unesco at torradu a propònnere unu tema chi est cussu de torrare a pònnere su mundu de su sartu de sa Sardigna a su tzentru de su dibàtidu culturale e polìticu. A prus de custu, s’ìsula est fintzas sa primu regione de su Mediterràneu in ue si paschet galu su bestiàmene a passiu.

Sa tràmuda est istòria, traditzione, cultura, ambiente. Sa punna de su progetu est chi totu custu si potzat fàghere fintzas isfrutende is innovatziones in campu digitale, cun una sèrie de aplicatziones pro aparatos mòbiles (telefoneddos inteligentes e tauleddas eletrònicas) e trastos pro sa geolocalizatzione chi un’incras ant a permìtere, a chie si siat, de pòdere connòschere a sa sola, s’istòria de su pastoriu e de su sartu de s’ìsula.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*