Sa cundidura de su virus calat ma donat pensamentu meda sa variante inglesa

In Sardigna sa cundidura de su Coronavirus est andende mègius. In is ùrtimas chidas is casos sunt abarrados pro su prus a suta de chentu a sa die, nùmeros chi indànimant sa Regione e faghent isperare chi si potzat colare dae sa zona groga a cussa bianca, cussa cun prus pagas limitatziones.

Nointames nch’est unu fatu chi est donende pensamentu meda, e est s’arribu in s’ìsula nostra de sa variante inglesa de su Covid. Difatis in Sardigna puru sunt istados agatados is primos casos: in Bono (serrada in zona ruja), in Madalena e in Santu Diadoru.

E pròpiu custa bidda de sa cosa baroniesa diat diat pòdere colare in zona ruja e duncas a unu perìodu de incùngiu. Dd’at annuntziadu sa sìndaga Rita Deretta in sa pàgina Facebook cosa sua: “A pustis de sa nota cun sa cale s’Ats recheret s’istitutzione de sa zona ruja in su Comunu nostru, so aprontende un’ordinàntzia”. Dae is 14 de oe a mesunote de su 10 de martzu “in totu su territòriu comunale ant a torrare is règulas istabilidas dae su Dpcm de su 18 de ghennàrgiu”. Sa prima tzitadina ispiegat de àere chircadu in ogna manera de evitare s’inserru, ma s’Ats at comunicadu una crèschida manna de is positivos.

E sa matessi detzisione dda diat podere pigare puru su sìndigu de Madalena. Fabio Lai at decraradu chi “sa dàbile istitutzione de sa zona ruja s’at a valutare a pustis chi ant èssere iscumproados is àteros datos rechertos a is ufìtzios cumpetentes”, pro ite “sa nota chi m’ant pedidu de istituire non narat nudda de su nùmeru de persones positivas a sa variante inglesa”.

Diversa est sa situatzione tzertificada dae sa fundatzione Gimbe pro su chi pertocat is cundiduras de coronavirus (sena variante). In Sardigna s’andamentu est in calada, gosi comente su càrrigu de traballu pro is ispidales: mènguat su nùmeru de is ricoverados, chi s’atestant in intro de is lìmites istabilidos dae su Guvernu.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*