Is indipendentistas sardos proant a si unire

Domìniga colada, su 23 de maju, tres delegatziones de ativistas de is fortzas indipendentistas Irs, militantes de ProgReS e is sustenidores de Torra, su coordinamentu nou de indipendentistas sena tèsseras, si sunt addobiados a Zuradili, a probe de Marrùbiu, pro annuntziare s’incumentzu de unu protzessu de diàlogu, mutidu Est Ora, tra is tres partidos.

Sa cunferèntzia de imprenta est istada aberta dae s’interventu de Franciscu Pala, unu de is promotores de Torra. Pala, – giai fundadore de Irs e ex responsàbile de su movimentu finas a su 2011, at faeddadu in calidade de cumponente de su comitadu de gestione de su blog Helis, e at solletzitadu totu is indipendentistas de torrare a organizare de s’indipendentismu polìticu, ma sena peruna presse. Fatu fatu a issu ant allegadu sos rapresentantes de is tres fortzas polìticas, ognuna cun su sìmbulu issoro, unidos in manera simbòlica dae is contzos de una broca nuràgica torrados a unire a pare.

Pro ProgRes est intervènnidu Adriano Sollai, ex dirigente de sa manca indipendentista, posca Edoardo Figus, de su coordinamentu de Torra, giai presidente istòricu de s’assòtziu de giòvanos indipendentistas Scida, ex militante de Sni finas a su 2014, e a ùrtimu su rapresentante de Irs, Simone Maulu – ativista istòricu e immoe referente de su movimentu pro su protzessu de diàlogu.

Custu protzessu de apresimentu est cumentzadu nemancu unu mese a oe, in ocasione de Sa Die de sa Sardigna, cando su movimentu Irs, su partidu Progres e su coordinamentu Torra ant annuntziadu sa nàschida de unu blog comunu – helis.blog – comente su primu logu de elaboratzione cumpartzida.

Is rapresentantes de is tres delegatziones ant fatu ischire chi non cherent istantargiare torra una coalitzione eletorale noa, ma petzi torrare a cosire is raportos, prus umanos chi non polìticos, tra is ativistas istòricos de Irs e de Progres e incruire fintzas elementos chi no ant mai fatu parte de is duos partidos.

Is tres fortzas polìticas si sunt incaressiadas a totu is sardos de Sardigna e de su disterru pro chi càstient cun atentzione a custa initziativa, cumbintos chi s’oferta polìtica progressista, internatzionalista, euromediterranea, ecologista, nonviolenta e antiratzista issoro potzat èssere acollida comente bàlida e credìbile.

Sas initziativas imbenientes de Est Ora ant a èssere publicadas in su giassu www.helis.blog e in sitos de is fortzas polìticas: irsonline.net, progeturepublica.net, torrasardigna.org.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*